ၵႂၢမ်းၵပ်းထုၵ်ႇ
ၵႂၢမ်းၼၢမ်း
Preface
ဢပုမ်ႇပွတ်းလႄႈ ၵႂၢမ်းၵပ်းထုၵ်ႇဢၼ်ဝႃႈၼႆႉပဵၼ်လွၼ်ႉၵႅၼ် ၾိင်ႈထုင်း ၵူၼ်းႁဝ်း ပဵၼ်ၶိူင်ႈလၢၵ်ႈၼၢၵ်ႈ တၢင်းတိုဝ်း ၵူၼ်းႁဝ်း ၵပ်းၸိူဝ်ႉၵပ်းၶိူဝ်း ပဵၼ်တီႈလီဢဝ်တႅၵ်ႈတိူင်းၼိူင်းမိူၼ် ဢုပမႃႇသေပိူင်ပိူင် ၸိုဝ်ႈၸႂ်ႈမႅၼ်ႈမၢၼ်ႇ မီးတၢင်း ယုမ်ႇယမ် ဢမ်ႇၸၢင်ႈထဵင် ဢမ်ႇၸၢင်ႈၶတ်း ပဵၼ်ဢၼ်ယုမ်ႇယမ်တမ်းၸႂ် ၽႂ်ၵေႃႈပေႃးၽွမ်ႉႁူမ်ႈသဵင်ႁူမ်ႈၵႂၢမ်းဢၢမ်း ယွင်ႈထေႃးၵၼႃႇ ၵူႈၵေႃႉၵူႈတီႈ ၵူႈမိူင်းမႃးလႆႈလီလီယဝ်ႉ။ ၵူၼ်းၶိူဝ်းလႂ်သေဢမ်ႇဝႃႈ မီးဢပုမ်ႉပွတ်း ဢဝ်တႅၵ်ႈ ဢဝ် တိူင်းၵူႈၶိူဝ်းယဝ်ႉ။ ၵႂၢမ်းၵပ်းထုၵ်ႇႁဝ်းၵွႆးဢမ်ႇၵႃး ၵမ်ႈၽွင်ႈ ယင်းဢဝ် လၢတ်ႈပႃးၵႂၢမ်းၵပ်းထုၵ်ႇ ဢဵင်းလဵတ်ႈ ၵျုႇပၢၼ်ႇ ဢမေႇရိၵၢၼ်ႇ ၶဝ်ၼၼ်ႉ လူၵွၼ်ႇ ၸင်ႇဝႃႈၵႃႈၶၼ် ဢပုမ်ႇပွတ်း ၵႂၢမ်းၵပ်းထုၵ်ႇၼႆႉ ယႂ်ႇတႄႉတႄႉ။
လုင်းတၢင်းၵႄး
ၵႂၢမ်းၵပ်းထုၵ်ႇ တွၼ်ႈ(ၵ)
ၵ သုမ်းပိူၼ်ႈၼႃႈတူႇ – ၵ မျၢတ်ႈၶႂ်ႈယူႇၸမ်
ၵ လၢႆလၢႆဝႃႈၵ – ငိုၼ်းၵဝ်ႇၶျလုမ်းၸွမ်း
ၵမျၢတ်ႈယႃႇၸူမ်း – ၵ သုမ်းယႃႇၶၢၼ်ႉ
ၵ မျၢတ်ႈယႃႇၸၢႆႇလူင် – ၸိုဝ်ႈႁူင်ယႃႇယွင်ႈၶိုၼ်ႈ
ၵ မီးသုၼ်ႇ – ၵုၼ်ႇၺႃးပွႆး
ၵ မျၢတ်ႈဢေႇ – ၶႅၼ်းသေလေႇၸၢႆႇလူင်
ၵ ဢမ်ႇမၢၼ် – ၵၢၼ်ဢမ်ႇပဵၼ်
ၵ ဢမ်ႇသုၼ်ႇ – ၼွၼ်းဢမ်ႇဢုၼ်ႇ
ၵ ဢမ်ႇသုၼ်ႇ – ၵုၼ်ႇၶမ်သမ်ႉငိုၼ်းမူတ်း
ၵ ၵိူဝ်းတွၼ်း – ၼွၼ်းၵိူဝ်းဢုၼ်ႇ
ၵ ထင်ႁိုင် – ၵိုတ်းမိုင်ယူႇမိူင်းပိူၼ်ႈ
ၵ ၸဵဝ်းမႃး – ၺႃးၵမ်းဢွင်ႇ
ၵ ၸဵဝ်းပွၵ်ႈ – ၵၢမ်ႇမျွၵ်ႈပၼ်
ၵ ၸဵဝ်းလႆႈ – ဢမ်ႇမႆႈၸႂ်
ၵ ၸဵဝ်းဝၢႆႇ – မႅၼ်ႈၽၢႆႇမၼ်း
ၵ ၸဵဝ်းမိူဝ်း – ၸူမ်းသိူဝ်းၵျ
ၵ ၸဵဝ်းမီး – ၵႂၢမ်းပီးၼႃႇ
ၵ ၸဵဝ်းယဝ်ႉ – ၶဝ်ႈၸဵဝ်းသုၵ်း
ၵ ၵႅမ်ၵျွင်း – တွင်းတွင်းႁွမ်ၶဝ်ႈႁႅင်ႈ
ၵ ဢမ်ႇမျၢတ်ႈၸူးမေႃ – လေႃဢဝ်ငိုၼ်းပေႃးသဵင်ႈ
ၵ ယေႈပွၵ်ႈၵိၼ်ယေႈဝၼ်း – ဢမ်ႇတၼ်းမီးမိူဝ်ႈလိုဝ်ႈ
ၵ ယေႈဝၼ်းၵိၼ်ယေႈဝၼ်း – ႁဵတ်းသင်ဢမ်ႇတၼ်းပိူၼ်ႈ
ၵ ယေႈဝၼ်းၵိၼ်ယေႈလိူၼ် – ၼွၼ်းဢိူၼ်လိူၼ်ၵေႃႈလႆႈ
ၵ ယေႈဝၼ်းၵိၼ်ယေႈၶူပ်ႇ – ၵႃႈပေႉတူပ်ႇဢမ်ႇမူတ်း
ၵ ယေႈလိူၼ်ၵိၼ်ယေႈလိူၼ် – ဝၢႆးလိုၼ်းဢမ်ႇမိူၼ်ပိူၼ်ႈ
ၵ ယေႈလၢႆးၵိၼ်တေႃႇၸူဝ်ႈ – ႁိူၼ်းဢုတ်ႇတူဝ်ႈတဵမ်မိူင်း
ၵ ယေႈလိူၼ်ၵိၼ်ယေႈပီ – ဢမ်ႇလူဝ်ႇၶီၸႂ်ၵွပ်ႈ
ၵ ယေႈလိူၼ်ၵိၼ်ယေႈၵၢတ်ႇ – မၢတ်ႇၼီႈသမ်ႉပေႃးလၢႆး
ၵ ယေႈၵၢတ်ႇၵိၼ်ယေႈလိူၼ် – ႁဵတ်းပွႆးလူင်မိူၼ်ပိူၼ်ႈ
ၵ သုမ်းတိုၼ်း – ၶႅၼ်းသေဢိုၼ်းယူႇဝၢၼ်ႈ
ၵ ၵၶၢႆၶၢႆငိုၼ်းႁၢႆၵွပ်ႈဢမ်ႇၼပ်ႉ
ၵ ၶိုၼ်ႈၵလွင်ႈ – ငိုၼ်းယေႈႁွင်ႈၵိုတ်းသၢမ်ပႄး
ၵ ယွၵ်းယွၵ်းၵယွင်ႇယွင်ႇငိုၼ်းႁွႆႉၼိုင်ႈတဵမ်တွင်ႇလွႆးလွႆး
ၵ တွင်ႉတၼ် – ၶၢႆၶၼ်ပေႃးသေပိူၼ်ႈၵေႃႈလႆႈ¬¬¬¬
ၵႃလူၼ်ႇႁိုဝ် ၼၵႃး – ႁၼ်မႃးၸင်ႇၵွႆႈယုမ်ႇ
ၵႃလူၼ်ႇႁိုဝ် ၼၵႃး – ႁႃးႁၼ်ၸင်ႇၸၢင်ႈလၢတ်ႈ
ၵႃႈလႆႈၵႃႈတၢပ်ႇ – ယၢပ်ႇၸႂ်မိူဝ်ႈၶႆႈၼၢဝ်
ၵႃႈလႆႈၵႃႈၵိၼ် – ၵိၼ်းၸႂ်မိူဝ်ႈႁဝ်းထဝ်ႈ
ၵႃႈယႂ်ႇၶၼ်လူင် – ပေႃးႁူင်လႆႈၵိၼ်ဢိမ်ႇ
ၵႃႈဢေႇၸၢင်ႈၶႄးႁူင် – ၵႃႈလူင်ၸၢင်ႈၶႄးသုမ်း
ၵႃႈၸၢင်ႉသၢမ်ႁဵင် – ၵႃႈၼၢင်းသၢမ်ပၢၵ်ႇ
ၵႃႈလႆႈၵႃႈသႆႉၵႆႉၵွတ်းတၢႆၽၢၼ်
ၵႃႈပိူၼ်ႈလၢတ်ႈယႃႇထွမ်ႇ – ၵႃႈပိူၼ်ႈထွမ်ႇယႃႇလၢတ်ႈ
ၵႃဢမ်ႇလူဝ်ႇၼႄးၵဝ်ႉ – လဝ်ႉဝဝ်ႉဝႆႉမိူၼ်ၵၼ်
ၵႆႉၵၢၼ်ဝၢၼ်ႈ – ၶၢၼ်ႉၵၢၼ်ႁိူၼ်း
ၵႆႉပၢႆႈၵႆႉၽၢၼ် – ၶူဝ်းႁိူၼ်းသႂ်ႇၵူၺ်သၢၼ်ဢမ်ႇတဵမ်လႆႈ
ၵႆႉသွၼ်ၸင်ႇလႆႈ – ၵႆႉၶႆႈၸင်ႉတွင်း
ၵႆႉပွတ်ႈၶႅၼ်းလီ – ၵႆႉသီၸင်ႇၵဵင်ႈ
ၵႆႇတူမ်ႈၵွၼ်ႉမႃးတမ်း – သမ်ႉယင်းမိၼ်ဢွၵ်ႇပႅတ်ႈ
ၵႆႉပွင်ႉၵႆႉၸႃႉ – ယေႈထႃႉယေႈတိုဝ်
ၵႆႉဢုပ်ႇႁူဝ်သႅၼ် – ၸၢင်ႈလႅၼ်ငိုၼ်းပိူၼ်ႈ
ၵႆႇႁၢင်ႈလီပိူဝ်ႈၶူၼ် – ၵူၼ်းႁၢင်ႈလီပိူဝ်ႈၶိူင်ႈ
ၵႆႇႁၼ်တိၼ်ငူး – ငူးႁၼ်ၶွင်ၵႆႇ
ၵႆၽေးႁႂ်ႈဝႄႈၽေး – ၸမ်ၽေးယႃႇဝႄႈၽေး
ၵိၼ်ၶဝ်ႈၽႂ် – ပဵၼ်ၸႂ်မၼ်း
ၵိၼ်ၵိၼ်ၶီႈၶီႈ – ဢမ်ႇထုၵ်ႇၼီႈတေၵႂႃႇမိူင်းလႂ်
ၵိၼ်ယဝ်ႉဢမ်ႇပတ်းတီႈ – ထုၵ်ႇၼီႈတေႃႇပေႃးတၢႆ
ၵိၼ်လီလီၼုင်ႈလိူမ်ႈလိူမ်ႈ – မၢၵ်ႇဢိုၼ်ႈၵိူမ်ႈႁၢမ်းၵႅၼ်
ၵိၼ်လူင်ဢမ်ႇပီး – ႁႅင်းလူင်ဢမ်ႇမီး
ၵိၼ်ဢိတ်းဢိတ်းၼုင်ႈဢေႇဢေႇ- လႆႈပွင်တႄႇပွႆးလူင်
ၵိၼ်ဢေႇဢေႇလူႇႁႅင်းႁႅင်း – ပိူၼ်ႈႁၵ်ႉပႅင်းၵူႈၵေႃႉ
ၵိၼ်ပႃဢမ်ႇလိူၵ်ႈၵၢင်ႈ – ၸၢင်ႈၸူၵ်ႉသဵပ်ႇၵူင်ၶေႃး
ၵိၼ်ၶဝ်ႈဝၢၼ် – ႁဵတ်းၵၢၼ်ၵႆႉ
ၵိၼ်ၶွင်ပိူၼ်ႈလၼ်းၵၼ်း – ၸူၵ်းထွင်းမၼ်းမိုဝ်းသၼ်ႇ
ၵိၼ်ၶဝ်ႈလဵင်ႉလၵ်း – ၵိၼ်ၽၵ်းလဵင်ႉယႂ်ႇ
ၵိၼ်လဝ်ႈသူႇယႃႈ – ယေႈလႃႈယေႈၶႅၼ်းယွမ်
ၵိၼ်ၼမ်တွင်ႉၶူၼ်ႉ – ဝူၼ်ႉၼမ်ႁူဝ်ႁွၵ်ႇ
ၵိၼ်လဵၵ်ႉထႃႈယႂ်ႇ – ၵိၼ်မႂ်ထႃႈယွတ်ႈ
ၵိၼ်ပႃပႄႉၶဝ်ႈ – ၵိၼ်လဝ်ႈပႄႉၼိူဝ်ႉ
ၵိၼ်လီၸင်ႇမီးႁႅင်း – ၼုင်ႈလီတႅင်းတႃပိူၼ်ႈ
ၵိၼ်လီၼွၼ်းဢုၼ်ႇ – ၵ သုၼ်ႇၶၢႆမၢၼ်
ၵိၼ်ၼမ်ႉႁူမ်ႈတဝ်ႈ – ၵိၼ်ၶဝ်ႈႁူမ်ႈမူႇ
ၵိၼ်ၶဝ်ႈႁဝ်းလၢတ်ႈၶိူဝ်းပိူၼ်ႈ – ၼမ်ႉငိူဝ်ႈသိူၼ်ႈထိုင်ၸိၵ်း
ၵိၼ်ၶဝ်ႈႁူမ်ႈႁႆ – ပႆတၢင်းႁူမ်ႈသဵၼ်ႈ
ၵူၼ်းႁၢင်ႈလီဢမ်ႇၵႃႈ – ၵူၼ်းထုၵ်ႇၼႃႈၼၢၼ်းမီး
ၵူၼ်းၼမ်ပွႆးဢမ်ႇၵိုၼ်း – ၽိုၼ်းၼမ်ၾႆးဢမ်ႇလုၵ်ႉ
ၵူၼ်းႁၢႆႉၵူၼ်းၼႃႈလၢႆး – ၵႂၢႆးႁၢႆႉၵႂၢႆးမႄႈမွင်ႉ
ၵူၼ်းႁၢင်ႈလီၽီဢဝ်ၵႂႃႇ – ၵူၼ်းႁၢင်ႈၸႃႉၽီလႃႇၶိုၼ်း
ၵူၼ်းၽၢၼ်ၵိုင်ႉၵၢင်ႉမီး – ၵႂၢမ်းပီးတၢၼ်ႇလုၵ်ႈပၵ်ႉ
ၵူၼ်းမီးၵိုင်ႉၵၢင်ႉၽၢၼ် – ၵႂၢမ်းဝၢၼ်တၢၼ်ႇၼမ်ႉဢွႆႈ
ၵူၼ်းႁၢင်ႈလီမီးလၢင်ႇ – ၵၢင်းႁၢင်ႈလီမီးၼူတ်ႇ
ၵူၼ်းႁၢင်ႈလီဢမ်ႇၵႃႈ – ၵူၼ်းႁၢင်ႈၸႃႉဢမ်ႇပေႃး
ၵူၼ်းမီးၸၢင်ႈၵႃႉ – ၸဝ်ႈၾႃႉၸၢင်ႈၵႂၢမ်း
ၵူၼ်းၵၢမ်ႇၵႅၼ် – ပၢႆႈတႅၼ်သမ်ႉၺႃးတေႃႇ
ၵူၼ်းၵၢမ်ႇၵႅၼ် – ၺႃးပိူၼ်ႈလႅၼ်ပိူၼ်ႈလၵ်ႉ
ၵူၼ်းႁၢႆႉပိူၼ်ႈၸင်ႇတႅၼ်ႇ – ၵူၼ်းၶႅၼ်ႇပိူၼ်ႈၸင်ႇပေႃႉ
ၵူၼ်းၸႂ်ဢမ်ႇသိုဝ်ႈ – ယႃႇလိုဝ်ႈႁူမ်ႈၸွမ်းၶဝ်
ၵူၼ်းၸႂ်ဢမ်ႇလီ – ယႃႇသီၶႆးႁူမ်ႈတႃႈ
ၵူၼ်းၵႃႉၵူၼ်းၵူး – သိုဝ်ႉမူးၶၢႆမၢတ်ႈ
ၵူၼ်းဢီးလိုမ်းၵေႃႈ – ၵေႃႉလူမ်ႉတွင်းယူႇ
ၵူၼ်းပဵၼ်ၸႂ်ပွတ်း – ၵူၼ်းၵွတ်းၸႂ်လမ်ငၢႆႈ
ၵူၼ်းႁူႉ ပဵၼ်ၵူၼ်ႈႁူး
ၵူၼ်းလီၸႂ်ႉလႄႈၵူၼ်းၸႂ်ႉလီ
ၵူၼ်းၼုမ်ႇၽိုတ်ႉၶဝ်ႈ – ၵူၼ်းထဝ်ႈလၼ်ဢွၵ်ႇ
ၵူၼ်ၸႂ်လီမီးဢေႇ – ၵူၼ်းၶႃႇၵေႇမီးၼမ်
ၵူၼ်းၽၢၼ်ၽႃႈႁူမ်ႇပွတ်း – ၵူၼ်းၵွတ်းၽႃႈႁူမ်ႇမၢင်
ၵူၼ်းႁူႉၼမ် – ၵူၼ်းၵမ်ဢေႇ
ၵူၼ်းလီၽီၸွႆႈမႃႉ – ၵူၼ်းၵျပိူၼ်ႈၸွႆႈႁၢပ်ႇ
ၵူၼ်းၼူၵ်ႇၺႃးၸိူၵ်ႈၽႅတ်း – ၵူၼ်းလႅတ်းၺႃးမၢၵ်ႇၵၢင်ႇ
ၵူၼ်းမီးငိုၼ်းလၢတ်ႈသမ်ႇ – ၵူၼ်းဢမ်ႇမီးလၢတ်ႈၶႅင်
ၵူၼ်းၸိုဝ်ႈႁူင် – ၵေႃႉသူင်ၼမ် – ၵေႃႉၸင်းၵေႃႈလိူင်ႇ
ၵေႃႉၸၢႆး – ဢိုၼ်ၼမ်ႉလၢႆးၸင်ႇလၢတ်ႈ
ၵေႃႉၵတ်ႉယူႇယၢၼ်ၵႆ – ၵေႃႉဢမ်ႇၶႆယူႇၵႂ်ႈ
ၵေႃႉလူဝ်ႇပၼ် – ဢမ်ႇၶႂ်ႈႁၼ်ၵေႃႉလူဝ်ႇလႆႈ
ၵေႃႉလူဝ်ႇလႆႈ – ၶႆႈပၼ်ႇႁႃၵေႃႉလူဝ်ႇပၼ်
ၵေႃႉၶႂ်ႈၵူႈမေႃၼွမ်း – ၵေႃႉၶႂ်ႈၸွမ်းမေႃယွင်ႈ
ၵေႃႉသိုဝ်ႉၶႂ်ႈလႆႈလၢႆ – ၵေႃႉၶၢႆၶႂ်ႈလႆႈၵႃႈ
ၵေႃႉပေႃႉယူႇၵႂ်ႈ – ၵေႃႉၶႄႁႂ်ႈယူႇၵႆ
ၵေႃႉႁၵ်ႉယေႈၽိုၼ်ၼင် – ၵေႃႉၸင်းယေႈၽိုၼ်သၢတ်ႇ
ၵေႃႉပႂ်ႉၵိၼ်မီးၵၢမ်ႇ – ၵေႃႉၵျၢမ်ႇႁႃလႆႈငၢႆႈ
ၵေႃႉပႂ်ႉၵိၼ်ဢမ်ႇသိုဝ်ႈ – ၵေႃႉႁႃဢမ်ႇလႆႈလိုဝ်ႈ
ၵေႃႉလဵဝ်ယႃႇလၢမ်းပႆ- ၶၢဝ်ႇမိူင်းၵႆၼၢၼ်းပွင်ႇ
ၵေႃလဵဝ်လၢမ်းလိမ်းၵႂႃႇ – ၽႃႇပူပ်ႉၸႃႉတၢႆလၢႆ
ၵေႃႉလဵဝ်ယႃႇပေၵႂႃႇ – ၼၢမ်ၸူၵ်ႉၽႃႇၽႂ်ဢမ်ႇၸွမ်းႁၼ်
ၵေႃႉၵူဝ်ပေႃးၽၢၼ် – ၵေႃႉႁၢၼ်ပေႃးမီး
ၵေႃႉယွင်ႈပဵၼ်တပေး – ၵေႃႉၼႄးပဵၼ်ြသႃႇ
ၵေႃႉႁဝ်းႁၵ်ႉၼႃႇၼႃႇ – ၸင်ႇႁတ်းလႃႇႁဝ်းၶိုၼ်း
ၵေႃႉႁၵ်ႉယူႇၵႆၵၼ် – ၵေႃႉဢမ်ႇၶႂ်ႈႁၼ်သမ်ႉယူႇၵႂ်ႈ
ၵေႃႉလၢတ်ႈၸႃႉတေမီး – ၵေႃႉလၢတ်ႈလီတေပႃး
ၵေႃႉလႂ်ၵေႃႉၼၼ်ႉ – ယႃႇဢဝ်ၽၼ်ႉၸပ်းၵၼ်
ၵေႃႉလႂ်ႁၢႆႉ – ၸိူၵ်ႈတေပၢႆႉၶေႃးမၼ်း
ၵေႃႉလႂ်လီ – ၽီၼိူဝ်ႁူဝ်တူၺ်းယူႇ
ၵႂႃႇလႄႇၸၢင်ႈၶမ်း – ၵမ်းၵမ်းၵိၼ်ၼမ်ႉၼဵင်ႈ
ၵႂႃႇဢႅဝ်ႇၸဝ်ႈၼႃး – ၵႆႉၺႃးၶဝ်ႈပုၵ်းၸီႇ
ၵႂႃႇဢႅဝ်ႇၸဝ်ႈႁႆႈ – ၵႆႉလႆႈၵိၼ်တႅင်
ၵႂႃႇၼႃႈႁႂ်ႈလူလင် – ၶူဝ်းသင်တူၵ်းၶိုၼ်းလႆႈ
ၵႂႃႇၸူးၶုၼ်ယႃႇၵႂႃႇပႃႈၼႃႈ – ၵႂႃႇၵိၼ်ၶႅၵ်ႇယႃႇႁႂ်ႈတူၵ်းလိုၼ်း
ၵႂႃႇလႂ်ႁႂ်ႈပဵၼ်မူႇ – ယူႇလႂ်ႁႂ်ႈပဵၼ်ၵေႃ
ၵူႈမိူဝ်ႈၵႅၼ်း – တႅၼ်းမိူဝ်ႈသႃႇ
ၵွတ်းထူၼ်ႈယဝ်ႉၸင်ႇႁႃ – ၶႃႁၵ်းယဝ်ႉၸင်ႇလၢပ်ႇ
ၵျၢမ်ႇတိူၵ်ႈၸင်ႇၶုတ်းသႅင်သိူဝ်ႈၶူဝ်းလႅင်ၵူဝ်ႈၵူမ်ႇ
ၵျၢမ်ႇတိူၵ်ႈၸင်ႇၶုတ်းၶမ်း – ႁူင်ႇၵူၼ်းယမ်းၸႄႈၼမ်ႉ
ၵတ်ႉၵေႃႈယႃႇဢုပ်ႇၼႅၼ်ႇ – ၶႅၼ်ႇၵေႃႈယႃႇဢုပ်ႇလူင်
ၵတ်ႉၵေႃႈယႃႇမၢတ်ႈႁဝ်းၶႅၼ်ႇ – လႅၼ်ႇၵေႃႈယႃႇမၢတ်ႈႁဝ်းမေႃ
ၵႂၢမ်းလႆႈဝႃႈၽႃႉလႆႈမၵ်း – မၢၵ်ႇႁိၼ်ႁၵ်းဢမ်ႇၵပ်းလႆႈ
ၵႂၢမ်းထၢမ်ၸဝ်ႈဢမ်ႇလႃႇ – ၵႂၢမ်းဢႃႇၵႃႇၽႂ်ဢမ်ႇၸူမ်း
ၵႂၢမ်းလႅၼ်ပႅၼ်ပၢၵ်ႇ – ယူႇယၢၵ်ႈဝၼ်းလိုၼ်း
ၵႂၢမ်းဢမ်ႇမီးလိူၵ်ႈဝႃႈ – ၶႂ်ႈၵိၼ်ၼေႃႇၸႄႈတႃႈသၢမ်လိူၼ် ၵႂၢမ်းၸဝ်ႈဝႃႈဢမ်ႇလိူဝ် – ၵႂၢႆးဢိူၵ်ႇၶိူဝ်ၵႃႈလႆႈၶီႇ
ၵႂၢမ်းယွၼ်းယႂ်ႇလိူဝ်သိုဝ်ႉ
ၵႂၢမ်းဢမ်ႇမီးၽၢမ်းဝႃႈ – ၵႃႈဢမ်ႇလႆႈၶတ်းဢဝ်
ၵၢမ်ႇလီၵေႃႈၸၢင်ႈၽၢၼ် – ၵၢၼ်လီၵေႃႈၸၢင်ႈသုမ်း
ၵၢမ်ႇသုၼ်ႇမုၼ်ပၼ် – ႁိုင်ႁိုင်ႁၼ်ယေႈပွၵ်ႈ
ၵၢမ်ႇလီမီးၵမ်ႈႁႃ – ၼႃးလီမီးၵမ်ႈၽုၼ်ႇ
ၵမ်းပိုင်းႁၢင်ႈၸႂ်ယႂ်ႇ – သႂ်ႇသႂ်ႇဢဝ်ႁၢမ်းလၢႆ
ၵတ်ႉသင်တၢႆၵွပ်ႈၼၼ်ႉ
ၵတ်ႉၼမ်ႉတၢႆၵွပ်ႈၼမ်ႉ – ၵတ်ႉၾႆးတၢႆၵွပ်ႈၾႆး
ၵွႆႈႁဵတ်းၵွႆႈယၢပ်ႇ – ၵွႆႈတၢပ်ႇၵွႆႈၽိတ်း
ၵွႆႈၶိုင်ၵွႆႈယၢၵ်ႈ – ၵွႆႈၶႂၢၵ်ႈၵွႆႈၵႂၢင်ႈ
ၵွႆႈၵိၼ်ၵွႆႈၵႅၼ်ႉ – ၵွႆႈလႅၼ်ႈၵွႆႈႁိူဝ်ႉ
ၵွႆႈယူႇၵွႆႈတိုမ် – ႁိုင်မႃးလိုမ်းပႅတ်ႈ
ၵွႆႈဝူၼ်ႉၵွႆႈၸႂ်ႈ – ၵွႆႈၶႂ်ႈၸႂ်ၵွႆႈလႅင်း
ၵွႆႈထွမ်ႇၵွႆႈၶႅမ်ႉ – ၵွႆႈယႅမ်ႉၵွႆႈပွင်ႇ
ၵွႆႈလၢတ်ႈၵွႆႈယၢၼ် – ၵွႆႈသၢၼ်ၵွႆႈၽိတ်း
ၵွႆႈယူႇၵွႆႈဢၢႆ – ၵွႆႈၶၢႆၵွႆႈဢမ်ႇၶၢတ်ႇ
ၵွႆႈႁိုင်ၵွႆႈၸတ်ႉ – ၵွႆႈႁတ်ႉၵွႆႈတႅၵ်ႇ
ၵွႆႈလၢတ်ႈၵွႆႈဢမ်ႇထွမ်ႇ – တႃသွမ်ႇသမ်ႉပေႃၶဵဝ်
ၵွႆႈႁဵတ်းၵွႆႈႁူႉ – ၵႆႉၸူႉၵႆႉမေႃ
ၵွႆႈယူႇၵွႆႈၸၢၼ်ႈ – ၵွႆႈတၢၼ်ႈၵွႆႈလီၸင်း
ၵွႆႈတိုတ်ႉၵွႆႈငၢၵ်ႈ – ၵွႆႈပၢၵ်ႈၵွႆႈတၼ်
ၵၼ်ႉႁဵတ်းၵၼ်ႉၵျၢမ်ႇ – ဢမ်ႇလႆႈၸၢမ်ႇတၢင်းလီ
ၵၼ်ႉလၢတ်တႄႉလၢတ်ႈဝႃႈ – သမ်ႉပွႆႇၼႃႈပွႆႇလင်
ၵၢၼ်ဢမ်ႇမီးၵေႃႈႁႃ – ငိုၼ်းဢမ်ႇမႃးၵေႃႈၵျၢမ်ႇ
ၵၢၼ်လီလူဝ်ႇမေႃၵျၢမ်ႇ – ၵၢမ်ႇလီလူဝ်ႇမေႃပွင်
ၵၢၼ်မိူၵ်ႈၵူႈလၢႆဢၼ် – ပိူၼ်ႈဢမ်ႇႁၼ်ၵေႃႈယႃႇပေၵျၢမ်ႇ
ၵၢၼ်လိူင်းၵူႈလၢႆလွင်ႈ – ပိူၼ်ႈယွင်ႈၵေႃႈယႃႇပေႁဵတ်း
ၵိုင်ႉၵၢင်ႉၵိၼ်ၵေႃႈၵႅၼ်ႉ – ၵိုင်ႉၵၢင်ႉလႅၼ်ႈၵေႃႈႁိူဝ်ႉ
ၵဝ်ႉၼႄးၵႃၵေႃႈ – ၵႃၼႄးၵဝ်ႉ
ၵဝ်ႉၼႄးႁၢင်ႈလမ်ၵႃ – ၵႃၼႄးၵဝ်ႉတႃယႂ်ႇ
ၵဝ်ႈၵေႃႉၵဝ်ႈၵမ် – ၵူၼ်ၼမ်ၵိၼ်ဢမ်ႇသဵင်ႈ
ၵဝ်ႈၵေႃႉၵဝ်ႈၵႄႇ – ႁႃၽိုၼ်းသႄႇၵူၼ်ႈမေႃႈဢမ်ႇမီး
ၵိူတ်ႇမႃးပႃး – ယႃဢမ်ႇလႆႈ
ၵိၼ်ၼိူဝ်ႉၵိၼ်ပႃ- ဢမ်ႇၵၢဝ်ႇႁႃပေႃႈမႄႈ – တိၼ်ယဵပ်ႇမၢၵ်ႇႁိၼ်ႁႄႈ – ၵၢဝ်ႇႁႃမႄႈဝႆးဝႆး
ၵွင်ႈၵေႃႈဢမ်ႇမီးတႃ – ပိူၼ်ႈငႃႁူဝ်ၵေႃႈလႆႈ
ၵႂၢႆးတေႃးၵၼ်ယႃႇယႃႇ – မႃးၼႃႇႁူဝ်တႄးၼႃး
ၵၢင်သႆးဢမ်ႇဢိုတ်းၵူၼ်ႈ – မူၼ်ႈယႃႉၵိၼ်တၢင်းၼႂ်း
ၵဵပ်းႁွမ်တွမ်ၸု – ဢမ်ႇတၼ်းႁူႉတဵမ်ပၼ်း
ၵၢပ်ႇပူၵ်ႇႁေႃႇမႆႉပူၵ်ႇ – ၵၢပ်ႇဢေႃႈႁေႃႇမႆႉဢေႃႈ
ၵိုၵ်းငိုၵ်းလႄႈၵိုင်ႇငိုင်ႇ – ၵိူၼ်ႈတၵ်းၵိုင်ႇၵၼ်မႃး ၵိုင်ႇငိုင်ႇလႄႈၵိုၵ်းငိုၵ်း – ပိူၼ်ႈတိုၼ်းၵိုၵ်းၵၼ်ဝႆႉ
ၵိုၵ်းလိုၵ်းၵဝ်ႇလဝ်ႇ – ၸၢင်ႈမေႃၶဝ်ႈမေႃယႅၼ်း
ၵိုင်ႉလိုင်ႉၵၢင်ႉလၢင်ႉ – ပူႇၵၢင်ႉၵေႃႈမၼ်းထဵင်
ၵိုတ်းလိုတ်းၵၢတ်ႇလၢတ်ႇ – ၶၢႆဢမ်ႇၶၢတ်ႇပေႃႉဢမ်ႇတၢႆ
ၵွင်ႇၵေႃႈဢမ်ႇႁၼ် – ဝၼ်းတၢႆဢမ်ႇႁူႉ
ၵူင်ႈငူင်ႈၵႃးငႃး – ပႃးၽိုၼ်းၶဝ်ႈၽၵ်းတူ
ၵူင်ႇငူင်ႇၵၢင်ႇငၢင်ႇ – ယုၵ်ႉၽိုၼ်းတၢင်ႇၼိူဝ်ၵၢင်ႉ
တွၼ်ႈ (ၵ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ၶ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ၶ)
ၶ ပေႃႈမႄႈၸၢင်ႈၽၢၼ် – ၶ လုၵ်ႈလၢၼ်ဢမ်ႇမီးသရေႇ
ၶ ပိူၼ်ႈယႃႇဝႃႈၸေး – ၼေးပိူၼ်ႈယႃႇဝႃႈၸွတ်ႇ
ၶႃဢမ်ႇၶႅင် ယႃႇၶတ်းၼမ်ႉၸႅဝ်ႈ
ၶႃႁၵ်းမီးၵူႈမၢၼ်ႈ – ၶႃႁၢၼ်ႈမီးၵူႈမိူင်း
ၶႃၽၢႆႇၼႃႈႁူႉၵႃႈဢမ်ႇမၢၵ်ႈ တၢၼ်ႇၶႃလင်
ၶႃႁၵ်းယဝ်ႉၸင်ႇၵႆႉ – ၾႆးမႆႈယဝ်ႉၸင်ႇလႅတ်း
ၶီႈမူလပ်ႉတႃ – ၶီႈမႃလပ်ႉၼႃႈ
ၶီႈႁႅင်ႈထုၵ်ႇတႃမႃ – ၶီႈတႃထုၵ်ႇၸႂ်ႁိၼ်ႉ
ၶီႈၵေႃႈထုၵ်ႇမႃ – ႁၢၵ်ႈၵေႃႈထုၵ်ႇမႃ
ၶီႈၸၢမ်ၵိုတ်း ၶႅၼ်းသေၶီႈလိုတ်းမိူဝ်ႈလိူၼ်သၢမ်
ၶီႈယႃႈလၵ်ႉႁၢႆႉ – ၶီႈၽၢႆႉယွၼ်းၸႃး
ၶီႈယႃႈၸၢင်ႈလၵ်ႉ – ၶီႈလဝ်ႈၸၵ်ႉၶုတ်ႉ
ၶႄႇထဝ်ႈၸၢင်ႈၵႃႉ – ဝထဝ်ႈဢွမ်ႇၾႆး – တႆးထဝ်ႈၸၢင်ႈပွင်ႉ
ၶႄႇလီတီႈတၢင်း – ၶၢင်လီတီႈႁိူၼ်း
ၶႄႇပၢၵ်ႇၸၢင် – ၶၢင်ပၢၵ်ႇၸႃႉ – ဝပၢၵ်ႇၵျၢမ်း
ၶႂ်ႈသုၵ်ႉႁဵတ်းပွႆးပၢင်း – ၶႂ်ႈသၢင်းလၢင်းၵႂႃႇပွႆးပိူၼ်ႈ
ၶႂ်ႈၸဵဝ်းႁႂ်ႈၵၢၼ်း – ၶႂ်ႈၼၢၼ်းႁႂ်ႈလႅၼ်ႈ
ၶႂ်ႈၵိၼ်ၼမ်ၵိၼ်ၵိင်ႇၵွႆႈ – ၶႂ်ႈၵိၼ်ၼွႆႈၵိၼ်မႄႈမိုဝ်း
ၶႂ်ႈၵိၼ်ၼမ်ၵွၼ်ႉၵေႇ – ၶႂ်ႈလႄႇလၢႆတီႈၸဵဝ်းလူင်း
ၶႂ်ႈမေႃလိၵ်ႈယူႇၵျွင်း – ၶႂ်ႈၸဵဝ်းတွင်းၵႆႉဝႃႈ
ၶႂ်ႈၸႃႉၼႃႈငေႃး – တေႃးသၼႃႈၵမ်ႇ
ၶႂ်ႈလႆႈတၢၼ်ႇၶႂ်ႈလႆႈၶီႈ – ၼႃႈဢမ်ႇၵီႈတင်းဝၼ်း
ၶႂ်ႈလႆႈတၢၼ်ႇတေတၢႆ – ၶၢႆသင်သိုဝ်ႉၵေႃႈၽွမ်ႉ
ၶႂ်ႈလႆႈၸင်ႇမႆႈၸႂ် – ၶႂ်ႂ်ႁၼ်ၸင်ႇတုၵ်ႉၶ
ၶႂ်ႈႁႂ်ႈပၢၼ်သၢဝ်လူႉ– ႁႂ်ႈဝႆႉၸုၼမ်ၼမ်
ၶႂ်ႈၵိၼ်လႄႈတၵ်ႉ – ၶႂ်ႈလၵ်ႉလႄႈတူင်ႉ
ၶႂ်ႈယႂ်ႇယူႇမိူင်းလဵၵ်ႉ – ၶႂ်ႈလဵၵ်ႉယူႇမိူင်းယႂ်ႇ
ၶႂ်ႈၵိၼ်ၸင်ႇတၵ်ႉ – ၶႂ်ႈႁၵ်ႉၸင်ႇလၢတ်ႈ
ၶႂ်ႈမီးၵေႃႈမႆႈ – ၶႂ်ႈလႆႈၵေႃႈမဝ်ႈ
ၶႂ်ႈလႆႈၵေႃႈၼႅတ်ႈ– ၶႂ်ႈပႅတ်ႈၵေႃႈ ႁိပ်ႈႁိပ်ႈမၢင်ႉမၢင်ႉ
ၶႂ်ႈမျၢတ်ႈႁႂ်ႈၶၢႆလုမ်း – ၶႂ်ႈသုမ်းႁႂ်ႈၶၢႆယွႆႈ
ၶႂ်ႈမျၢတ်ႈၵႃႈတီႈၵႂ်ႈ – ၶႂ်သုမ်းၵႃႉတီႈၵႆ
ၶၢမ်ႇၼမ်ႉၸႂ်ယႂ်ႁိူဝ်း – ပႆတၢင်းၵိူဝ်းလီၵေႃႉ
ၶႅမ်ပႆၵေႃႈမႆၸွမ်း – ၽူဝ်ပႆၵေႃႈမေးၸွမ်း
ၶၢမ်ႈၼမ်ႉယႃႈလုတ်ႈတႃႈ – ဝႃႈသင်ႁႂ်ႈတွင်းၵႂၢမ်း
ၶိၼ်းၵၼ်ဢမ်ႇမႃးၶိုၼ်ႈ – တိုၼ်ႈၼင်ႇလွၵ်းသၢႆလီ
ၶိုၼ်ႈသၢႆဢူၵ်းၵေႃႈ ယွၼ်ႇသၢႆႁၢင်
ၶူဝ်လွႆးလွႆးၶၼ်ၵႃႈ – ၶူဝ်ဢႃႈပၢၵ်ႇၶၼ်ပေႃး
ၶူဝ်လီၶူဝ်ပႃႈၼႃႈ – ၶူဝ်ၸႃႉၶူဝ်ပႃႈလင်
ၶူဝ်ၽၢႆႇၼႃႈဢမ်ႇပဵၼ်သင် – ၶူဝ်ပႃႈလင်ပိူၼ်ႈၶႂ်ႈၸႃႉ
ၶိၼ်းပိူၼ်ႈယဝ်ႉလိုမ်းဝၼ်း – ၽိူဝ်ႇႁဝ်းတၼ်းပိူၼ်ႈဢမ်ႇၽွမ်ႉ
ၶိၼ်းၵၼ်ႁႂ်ႈတွင်းယၢမ်း – ၵႂၢမ်းၸင်ႇမီးၵတိ
ၶုၼ်လႆႈၼႃႈ – ၶႃႈတေတၢႆ
ၶူဝ်းသၢင်းၽေႃး – ပေႃးၽႂ်ပၢႆႉတေႃလွၵ်ႇမၼ်းငိူဝ်ႈ
ၶဝ်ႈဢမ်ႇလိူဝ် – ၵိူဝ်ဢမ်ႇၼဝ်ႈ
ၶဝ်ႈဢၢၼ်လႅင် – ၽၵ်းၵႅင်ၸၢင်
ၶဝ်ႈလိူင်ႇငိုၼ်းမၢၵ်ႈ – ဢမ်ႇယၢၵ်ႈၸႂ်သင်
ၶဝ်ႈဢုၼ်ႇၽၵ်းမႆႈ – လႆႈၵိၼ်ၶိုတ်းယၢမ်း
ၶဝ်ႈဢမ်ႇႁၢဝ်ႈတမ်ၼဵဝ် – လုၵ်ႈၵေႃႉလဵဝ်ဝႃႈယၢၵ်ႈ
ၶဝ်ႈၵႃႈဢမ်ႇပေႃးၶီ – လုၵ်ႈဢမ်ႇလီၸင်ႇယၢၵ်ႈ
ၶဝ်ႈတေမူတ်းၵိၼ်ဝၢၼ် – ၵူၼ်းတေၽၢၼ်ၸိုဝ်ႈလု
ၶၢဝ်ႇမိူင်းၵႆလႅပ်ႈၶိုၵ်ႉ – ဢမ်ႇပေႃးၶိုၵ်ႉလူင်လၢင်
ၶၢဝ်ႇမိူင်းၵႆလႅပ်ႈၸႂ်ႈ – ႁၼ်ၵႂ်ႈဢမ်ႇၵႃႈႁိုဝ်
ၶၢဝ်ႇၸႃႉၵႂႃႇသိပ်းဝၼ်း – ၶၢဝ်ႇလီပႆႇတၼ်းၽၢၵ်ႈ
ၶွင်ၶၢႆၼင်ႇၶွင်လူႇ – တီႇယူႇၼင်ႇႁေႃၶမ်း
ၶွင်လီဢမ်ႇတၢပ်ႈၼမ် – ၶီႈယႃႈပႄႉၵမ်းၶဝ်ႈ
ၶွင်ဢမ်ႇၼမ် – ယႃႇၵိၼ်ၸမ်ႁူးလွင်ႈ
ၶွင်ဢမ်ႇလီပိူၼ်ႈပႅတ်ႈ – ဢၢႆႈမၢၵ်ႇတႅတ်ႇၵဵပ်းဢဝ်
ၶွင်ပႅတ်လၢႆပိူၼ်းဝၢင်း – တူၵ်းၵၢင်တၢင်းယႃႇၵဵပ်းဝႆႉ
ၶွင်မဝ်ပိူၼ်ႈၸင်ႇပႅတ်ႈ – ယႃႇႁိပ်ႈၼႅတ်ႈၵဵပ်းဢဝ်
ၶွင်လီပေႃႇမီးမိူဝ်ႈ – ၵူၼ်းငိူဝ်ႈဢမ်ႇမေႃၵိၼ်
ၶွင်ၵႃႈပေႃႇမီးလိူၼ် – ဢၢႆႈဢိူၼ်လိူၼ်ဢမ်ႇမၵ်ႉ
ၶွင်လီဢမ်ႇပေႃး – ၶွင်ပေႃးဢမ်ႇလီ
ၶွင်လီသမ်ႉဢမ်ႇၵႃႈ – ဝႃႈဢမ်ႇဝႃႈပဵၼ်ဢၼ်ၵႅၵ်း
ၶွင်လီဢမ်ႇၵႃႈယႂ်ႇ – သႂ်ႇတႄႉၺႃးၶွင်ပွမ်
ၶွင်ၵႃႈၸင်ႇလီ – ၶွင်ပေႃႈၶီႈႁေႈ
ၶွင်ၸဝ်ႈၵဝ်ႇ – ႁူဝ်ၶဝ်ႇၶွၼ်း
ၶွင်ပိူၼ်ႈသမ်ႉၶႂ်ႈတႅၵ်ႇ – ပႅၵ်ႉသၢၼ်ႇဢမ်ႇၶႂ်ႈၸူၵ်း
ၶူၼ်ႉတိူၵ်ႇၼႃးယိူဝ်ႈၼဝ်ႈ – ၶူၼ်ႉၵႂၢမ်းၵဝ်ႇၽိတ်းၵၼ်
ၶၢႆယၢပ်ႇပိူဝ်ႈသိုဝ်ႉၵႃႈ – ဝႃႈယၢပ်ႇပိူဝ်ႈၵူၼ်းတိုဝ်
ၶၢႆလီမီးပိူဝ်ႈသုၼ်ႇ – ၼွၼ်းဢုၼ်ႇပိူဝ်ႈၽႃႈၼႃ
ၶမ်းၼုၵ်းလိၼ်လႅင် – သႅင်ၼုၵ်းလိၼ်ၵူမ်ႇ
ၶႆးပႆႇဢွၵ်ႇ – ၶွၵ်ႇပႆႇယႃႉ
ၶႆႈၶိူဝ်းမိူင်းၸႂ်လူႉ – ၶႆႈၶိူဝ်းၸုၸႂ်လီ
ၶႅၵ်ႇၵိုၼ်းၵေႃႈငိုၼ်းၶွၼ်ႈ – ၶႅၵ်ႇၵွၼ်ႈၵေႃႈငိုၼ်းၼွင်း
ၶႅၵ်ႇၶၢႆၶႅၵ်ႇၵႃႉ – မႃႉပၼ်ၸဝ်ႈႁိူၼ်းမီး
ၶႅၵ်ႇမႃးပႃးငိုၼ်းၶဝ်ႈ – ၶႅၵ်ႇတဝ်ႈပႃးငိုၼ်းၸူး
ၶႅၵ်ႇငိုၼ်းၶႅၵ်ႇတွင်း – ၼွင်းမႃးယေႈၶႅၼ်းၶႅမ်ႉ
ၶႅၵ်ႇလၢဝ်းမႃႉ – ၵႃႉမျၢတ်ႈမႅင်ႇငိုၼ်ႈႁွမ်
ၶႅၵ်ႇသိုဝ်ႉၶႅၵ်ႇၶၢႆ – မႃးလၢႆပွၵ်ႈၵေႃႈယဝ်ႉ
ၶႅၵ်ႇၵိၼ်ၶႅၵ်ႇၵူႈ – ဢမ်ႇသူႈမႃးၶႅၼ်းလီ
ၶႅၵ်ႇလၢဝ်းတွၼ် – ၸွၼ်ၵိၼ်လၢႆ ပၢႆယွၼ်းၵူႈ
ၶႅၵ်ႇတဝ်ႈၵေႃႈ – ၸဝ်ႈႁိူၼ်းမဝ်း
ၶႅၵ်ႇမႃးဢမ်ႇပႃးၽႃႈ – သမ်ႉဝႃႈၸဝ်ႈႁိူၼ်းထီႇ
ၶႅၵ်ႇမႃးဢမ်ႇပႃးၽႃႈ – ယၢပ်ႇတၢၼ်ႇၶႃႈလိပ်းၶဝ်
ၶႅၵ်ႇလၢဝ်းတွၼ် – ၸွၼ်ၵိၼ်ၸွၼ်ၼွၼ်း – သမ်ႉပၢႆယွၼ်းႁေႃႇၶဝ်ႈ
ၶႅၵ်ႇၸဝ်ႈၶႅၵ်ႇၶုၼ် – ၶႅၵ်ႇၸဝ်ႈမုၼ်လုမ်းလႃးယၢပ်ႇ
ၶႅၵ်ႇထဝ်ႈၶႅၵ်ႇဢူဝ်ႇ – လႆႈၵုသူဝ်ႇၵေႃႈၶၢၼ်ႉလုမ်းလႃး
ၶႅၵ်ႇလီမီးၶွင်ၽၢၵ်ႇ – ၶႅၵ်ႇၸႃႉပၢၵ်ႇသဵင်ၸၢင်
ၶႅၵ်ႇထင်ႁိုင်ၼၢၼ်းမိူဝ်း – လၢႆးတၢၼ်းသိူဝ်းပေႃးႁၢႆ
ၶႅၵ်ႇထင်ႁိုဝ်ၼၢၼ်းပွၵ်ႈ – လွၵ်ႈၽႃႈသၵ်ႇပေႃးမဝ်း
ၶႅၵ်ႇလီၶႆႈတြႃး – ၶႅၵ်ႇၸႃႉမႃးၶႃႉပိူၼ်ႈ
ၶမ်ႈဝႃႈသႂ် – ၼႂ်ဝႃႈၶုၼ်ႇ – လႅတ်ႇဢုၼ်ႇဝႃႈႁူဝ်မဝ်း
ၶၢၼ်ႉဢၢပ်ႇၼမ်ႉ – သမ်ႉၶႂ်ႈၼုင်ႈၶူဝ်းၶၢဝ်
ၶၢၼ်ႉဢွၵ်ႇငိုၼ်းတွင်း – သမ်ႉမွင်းၵိၼ်လီ
ၶၢၼ်ႉသၵ်ႉၶူဝ်းၸင်ႇတူႇ – ယူႇသုၵ်ႉသၵ်ႉၸင်ႇမဵၼ်
ၶၼ်ၶိုၼ်ၼႅတ်ႈၸူမ်းၶၢႆ – ၶိုၼ်းသေးလၢႆဢမ်ႇယဝ်ႉ
ၶၼ်ၶိုၼ်ႈယႃႇၼႅတ်ႈၶၢႆ – ၶၼ်တၢႆလူဝ်ႇသိုဝ်ႉဝႆႉ
ၶၼ်သႅင်ဢမ်ႇယူႇတီႈၵဝ်ႇ – ၶၼ်ၶဝ်ႈဢမ်ႇမီးတီႈလဵဝ်
ၶေႃႈၸိုဝ်ႈသဵင်ဢမ်ႇၸႂ်ႈ – ၽႂ်ၵေႃႈဢမ်ႇၶႂ်ႈထွမ်ႇ
ၶိင်ႇဢမ်ႇသႃႇ – ၶႃႇဢမ်ႇမႅၼ်ႈ – ယႃႇလႅၼ်ႈၵႂႃႇလႅၼ်ႈမႃး
ၶူပ်ႇမိူဝ်ႈပိူၼ်ႈလဵင်ႉႁဝ်း – ၶူပ်ႇမိူဝ်ႈႁဝ်းလဵင်ႉပိူၼ်ႈ
တွၼ်ႈ (ၶ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (င) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(င)
င ဝႃႈငိုၼ်း – ႁႃဝၼ်းၶိုၼ်းယႃႇၶၢၼ်ႉ
င ဝႃႈငိုၼ်း – ႁဝ်းတိုၼ်းလူဝ်ႇမေႃၸၢႆႇ
င ဝႃႈငိုၼ်း – ႁွမ်ၼမ်ၵိုၼ်းၸင်ႇမၢၵ်ႈ
င ဝႃႈငိုၼ်း – ၽႂ်မီးၵေႃႈတိုၼ်းၵျ
ငႃတေလူမ်ႉပိူၼ်ႈပူၵ်း – ငႃတေတူၵ်းပိူၼ်ႈႁွပ်ႇ
ငႃတေႁဵတ်းသမ်ႉၵၢတ်ႈ – ငႃတေလၢတ်ႈသမ်ႉၵၵ်း
ငႃတေၵိုတ်းသမ်ႉလႃႇ – ငႃတေၵႂႃႇသမ်ႉထႃႉ
ငႃငမ်ႉၸၢင်ႈၶႄးႁိုင် – လူဝ်ႇၶိုင်ၸဵမ်မိူဝ်ႈၸဝ်ႉ
ငႃတေၽၢၼ်သမ်ႉၶႅၼ်း – ငႃတေၵႅၼ်းသမ်ႉသုၼ်ႇ
ငႃၼင်ႈသမ်ႉမီးလုၵ်း – ငႃၸုၵ်းသမ်ႉမီးၶႃႇ
ငႃးမဵတ်ႉၼိုင်ႈဢမ်ႇပဵၼ်မၼ်း – ၽၼ်းမဵတ်ႉၼိုင်ႈဢမ်ႇပဵၼ်သူၼ်
ငူးဢမ်ႇၸၢင်ႈပႆ – ၵႆႇဢမ်ႇၸၢင်ႈလိူၼ်ႈ
ငူးႁၼ်ၶွင်ၵႆႇ – ၵႆႇႁၼ်တိၼ်ငူး
ငူးလိူမ်ထႃႈၶွၼ်ႉ – ယွၼ်ႉပိူဝ်ႈဢိူၼ်လိူၼ်
ငူးလိူမ်ပႂ်ႉဢူမ်ၶဵတ်ႇ – ႁူဝ်ယဵတ်ႇၵေႃႈႁၢင်ၶူတ်း
ငူးလူင်လႆႈၺႃးၶွၼ်ႉ – ယွၼ်ႉပိူဝ်ႈထၢင်ႇလႆႈၵိၼ်
ငူးလိူမ်ပႂ်ႉဢိုၼ်ၽၢၼ်း – ၼူၵ်ႉယၢင်းဢၢၼ်းတိပႃ
ငေႃးတေႃႇငေႃး – ၽၵ်းၵုတ်ႇၸေႃးလေႃးၵုင်ႈ
ငၢႆႈပိူဝ်ႈယၢမ်ႈ – ဢၢမ်းပိူဝ်ႈဢမ်ႇပွင်ႇ
ငၢႆႈဝႃႈငၢႆႈ – ဢၢႆႈၵိၼ်ၵူၺ်ႈယင်းလႆႈပွၵ်ႇပိူၵ်ႇ
ငၢႆႈပိူဝ်ႈႁူႉ – လုပိူဝ်ႈဢမ်ႇမေႃ
ငူမ်းပႃမိူဝ်ႈၼမ်ႉၶုၼ်ႇ – တၢၵ်ႇၽႃႈမိူဝ်ႈလႅတ်ႇဢုၼ်ႇ
ငိုၼ်းႁွင်ႉငိုၼ်း – ၵိုၼ်းဝႆးၼႃႇ
ငိုၼ်းၶမ်းမီးၵူႈပၢႆမႆႉ – ၽႂ်ၵႆႉၵေႃႈပဵၼ်ပုၼ်ႈမၼ်း
ငိုၼ်းၼမ်တႃသမ်ႉပႄႉ – လႄႉလႂ်ၵေႃႈမျၢတ်ႈတိၵ်းတိၵ်း
ငိုၼ်းၼမ်ၸင်ႇဢမ်ႇၽၢၼ် – ၵၢၼ်ၼမ်ၸင်ႇဢမ်ႇၵွတ်း
ငိုၼ်းၼမ်ဢမ်ႇၶၢၼ်ႉ – ၵၢၼ်ၼမ်ဢမ်ႇၵူၼ်ႉ
ငိုၼ်းၼမ်ၸႂ်ၼုမ်ႇ – ၶဝ်ႈၵုမ်ႇၸႂ်လူၼ်း
ငိုၼ်းၼမ်ဢမ်ႇၶႃႇၵေႇ – ဢမ်ႇၼမ်ဢမ်ႇဢေႇ ယေႈၶႅၼ်းၵျွႃး
ငိုၼ်းၼမ်ၶမ်းပေႃး – လေႃးၽယေႈၶႅၼ်းယႂ်ႇ
ငိုၼ်းၼမ်ဢမ်ႇမီးလုၵ်ႈ – တုၵ်ႉၶလိူဝ်ၸိူဝ်းၽၢၼ်
ငိုၼ်းဢမ်ႇၸၢင်ႈႁႃ – ၼႃးဢမ်ႇၸၢင်ႈႁဵတ်း
ငိုၼ်းဢေႇလုၵ်ႈသမ်ႉၵိုၼ်း – ႁႃဝၼ်းၶိုၼ်းဢမ်ႇၵုမ်ႇ
ငိုၼ်းဢေႇတႃသမ်ႉၵႂင် – သိုဝ်ႉလႆႈသင်သိုဝ်ႉၵေႃႈသုမ်း
ငိုၼ်းဢေႇတႃသမ်ႉၽိတ်း – ထၢင်ႇမျၢတ်ႈဢိတ်းဢိတ်း သမ်ႉသုမ်းသဵင်ႈသဵင်ႈ
ငိုၼ်းမူတ်းယႃႇၶၢၼ်ႉ – ၵၢၼ်မူတ်းယႃႇလိုဝ်ႈ
ငိုၼ်းႁႅင်ႈယႃႇၵိုတ်း – ငို်ၼ်းယိုတ်းယႃႇငဝ်
ငိုၼ်းဢၼ်ပိူၼ်ႈၵူႈၵႂႃႇ – ယႃႇထၢင်ႇတေဢွၵ်ႇႁၢင်
ငိုၼ်းဢမ်ႇတူင်ႉငိုၼ်းတၢႆ – ငိုၼ်းပႅတ်ႈလၢႆပိူၼ်ႈၵူႈ
ငဝ်ပႃးၺၢၼ်ႇ – ႁၢၼ်ႇပႃးၵူဝ်
ငဝ်ႈၶၢႆပၢႆၵိၼ် – တိၼ်မိုဝ်းဢမ်ႇၵူဝ်ႈ
ငဝ်ႈၶိူင်ႇပၢႆၵိုမ်း – လိုမ်းၸႂ်လီၼႃႇ
ငဝ်ႈလီပၢႆၵျ – ၽႂ်ယႃႉဢမ်ႇလႅဝ်
ငဝ်ႈတိုင်ႇပၢႆႁဵဝ်ႇ – ယဵဝ်ဢမ်ႇပေႃးသႆႉ
ငဝ်ႈၵႂၢင်ႈပၢႆၵႅပ်ႈ – ဢမ်ႇလႅပ်ႈပေႃးႁူင်
ငဝ်ႈယႂ်ႇပၢႆဢွၼ်ႇ – ဢမ်ႇႁွၼ်ႇတွၼ်ႉထူး
ငဝ်ႈတင်ႈပၢႆၵွမ်း – ၵွႆၸွမ်းဢမ်ႇၵၢတ်ႈ
ငဝ်ႈႁဵဝ်ပၢႆတိုင်ႇ – ဢမ်ႇၵိုင်ႇၼမ်ႉၵိုင်ႇတူဝ်
ငဝ်ႈသိုဝ်ႈပၢႆငေႃး – ဢမ်ႇပေႃးလီယွင်ႈ
ငဝ်ႈႁိူၼ်းမေႃၸတ်းၵၢၼ် – လုၵ်ႈလၢၼ်ၵတ်ႉၵူႈၵေႃႉ
ငဝ်ႈလၢႆးၵေႃႈပၢႆလၢင်ႇ – ငဝ်ႈၸႅတ်ႈၸၢင်ႇၵေႃႈပၢႆၸွၼ်းငွၼ်း
ငဝ်ႈၵႃႈ – ပၢႆပေႃး
ငဝ်ႈတႅင်လၢႆး – ပၢႆတႅင်တွမ်ႇ
ငဝ်တေႃႇငဝ် – ပိူၼ်ႈလၵ်ႉဢဝ်ၶူဝ်းသဵင်ႈ
ငၢဝ်ႈတေႃႈငၢဝ်ႈ – ၾႆးၸုတ်ႇၵၢဝ်ႈၼႄၵၼ်
ငၵ်းတေႃႇငၵ်း – ၼႄတၢင်းလၵ်းႁႂ်ႈပိူၼ်ႈ
ငိၼ်းပိူၼ်ႈဝႃႈ – ဢမ်ႇတၢၼ်ႇၵႃႈႁဝ်းႁၼ်
ငိၼ်းပိူၼ်ႈသမ်ႉပိူၼ်ႈဢုပ်ႇ – ယႃႇၸုပ်ႇပၢၵ်ႇၵမ်းလဵဝ
ငိၼ်းၵႂၢမ်းၵႆမၢင်ႉၼႅတ်ႈ – ၽူဝ်မေးၸၢင်ႈပႅတ်ႈၵၼ်
ငိၼ်းသဵင်ၵေႃႈလီႁၵ်ႉ – ယၵ်ႉတူၺ်းၵေႃႈလီပႅင်း
ငိၼ်းသဵင်တႃႉလီၸင်း – ၼင်ႈႁိမ်းတႃႉလီမိူဝ်ႇ
ငိၼ်းလူမ်းပဝ်ႇမႂ်မႆႉ – ပေႃးၵႆႉယုမ်ႇၽိတ်းၵၼ်
ငိၼ်းပိူၼ်ႈဝႃႈၵေႃႈလၢႆး – ၵေႃႉၸၢႆးယႃႇၼႅတ်ႈယုမ်ႇ
ငိၼ်းၶၢဝ်ႇဢမ်ႇတၢၼ်ႇတႃႁၼ် – ထၢမ်ၵၼ်ဢမ်ႇမိူၼ်တူဝ်ႁူပ်ႉ
ငိၼ်းၸိုဝ်ႈပေႃးလီၵူဝ် – ႁၼ်တူဝ်ပေႃးလီၽၢၼ်ႈ
ငိၼ်းၵႂၢမ်းသင်ၵေႃႈယုမ်ႇ – ၵုမ်ႇမိုင်ႉၸဵပ်းၸႂ်လၢႆ
ငိူဝ်ႈဢမ်ႇၵႂႃႇ – လႅမ်ဢမ်ႇမႃး
ငိူဝ်ႈတေႃႇငိူဝ်ႈ – ၼမ်ႉမၼ်းၽိူဝ်ႈၸပ်းၵၼ်
ငိူဝ်ႈတေႃႇငိူဝ်ႈ – လွၼ်ႈသိူဝ်ႈႁႂ်ႈပိူၼ်ႈႁၼ်လင်
ငိူဝ်ႈယဝ်ႉၸင်ႇလၵ်း – ႁၵ်းယဝ်ႉၸင်ႇလႅမ်
ငိူဝ်ႈငႃႉလႄႈငိုၵ်းငၢၵ်ႇ – ၵႃႉယွႆႉပၢၵ်ႇမိူၼ်ၵၼ်
ငိုၵ်းတေႃႇငိုၵ်း – ပၼ်ပိူၼ်ႈၸိုၵ်းၵႂႃႇသဵင်ႈ
ငၵ်းပႆႇႁိူဝ်ႈ – ငိူဝ်ႈပႆႇၸၢႆႇ
ငၢႆႈလိူဝ်မိူဝ်ႈၵဝ်ႇ – လဝ်းလိူဝ်မိူဝ်ႈၵွၼ်ႇ
ငၢႆႈၵေႃႈယႃႇလိုၼ်ႈ – တိုၼ်ႈၵေႃႈယႃႇယင်ႇ
ငေႃးတေႃႇငေႃး – ၼႃႈဢမ်ႇပေႃးထွင်ႇလႅတ်ႇ
ငၢၼ်တေႃႇငၢၼ် – ၵၢၼ်သင်ၵေႃႈဢမ်ႇသုတ်ႈ
တွၼ်ႈ (င) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ၸ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ၸ)
ၸ ႁူမ်ႈၶီ – လီႁူမ်ႈၸၢမ်ႇ
ၸ ပႃးလီ – ၶီပႃးၸူမ်း
ၸ တေႃႇၸ – မၢၵ်ႇၼႃႉၵပ်းၶဝ်ႈယဵၼ်
ၸ တေႃႇၸ – ၽႃႉမႆႉလႅၵ်ႈၵိူဝ်သၢႆး
ၸ ၵေႃႈဢမ်ႇၶီ – လီၵေႃႈဢမ်ႇၸူမ်း
ၸ ၸဵဝ်းလီ – ၶီၸဵဝ်းသိူဝ်း
ၸ ပႃးဝွၼ်း – ယွၼ်းပႃးလၵ်ႉ
ၸ ၼွၼ်းဝၼ်း – ၶႅၼ်းသေ ၸမေႃးပၼ်းၸင်ႇၸင်ႇ
ၸ မႄႈလႅၼ်ႈႁႆႇမေႃႈ – ၸ ပေႃႈလေႃႈၽၢင်ႈဝၢၼ်ႇ
ၸ ၼွၼ်းထူ – ၶႅၼ်းသေ ၸသူပ်းမူတိုပ်ႉၽၢင်ႈ
ၸ ၸၢင်ႈပွင်ႉ – ၶႅၼ်းသေ ၸ သွင်ႉပၢႆႈ
ၸ ၸၢင်ႈလႃႇ – သႃႇလိူဝ် ၸ ၸၢင်ႈႁႅမ်
ၸ ၼႃႈၵူတ်ႉ – ၶႅၼ်းသေ ၸ ၶူတ်းၼွၼ်း
ၸ တိုပ်ႉၽၢင်ႈ – ႁၢႆႉလိူဝ် ၸ ၸၢင်ႈမေႃး
ၸ ႁဵတ်းၵၢၼ် – လီသေ ၸ ၶၢၼ်တွပ်ႇ
ၸ ႁွပ်ႇၶူဝ်းပၢႆႈ – ႁၢႆႉလိူဝ် ၸ ထဵင်ၸႃး
ၸ ၶူတ်းမေႃး – ၶႅၼ်းသေ ၼႃႈႁိူၼ်းမေႃးသူင်ႈသူင်ႈ
ၸ ၼႃႈသူမ်ႈ – ဢမ်ႇတၢၼ်ႇ ၸ ၵူမ်ႈၼႃႈဢမ်ႇသဵင်
ၸ ဢမ်ႇမီး – လီဢမ်ႇပေႃႇ
ၸ ယွႆႈၸယႅမ်း – ႁႃလႅမ်းတၢင်းၽိတ်းပိူၼ်ႈ
ၸ မေႃႈၸႁႆ – ပႆပေႃးယွပ်ႇယင်ႇယင်ႇ
ၸ ၸ ပွင်ႉပွင်ႉ – သွင်ႉမေႃႈတွႆႇဝၢၼ်ႇ
ၸူးၸႂ်မိူၵ်ႈၸႂ်ယွင်ႇ – လတ်းႁႃထွင်ႇၵွႆးၵွႆး
ၸူးၸႂ်သဝ်ႈၸႂ်သႅဝ်း – ထၢမ်ႁႃလႅဝ်းလွၼ်ႉ
ၸူးၸႂ်ပုတ်းၸႂ်ၶၢတ်ႇ – ၵွႆးၶႂ်ႈပၢတ်ႇၶႂ်ႈထိူဝ်
ၸူးၸႂ်ႁၢဝ်ႈ ၸႂ်ၵျၢမ်း – ယၢမ်းလႂ်ၵေႃႈထၢမ်တႅၼ်ႇ
ၸူးၸႂ်ၼိုၵ်းၸႂ်ၼူၵ်ႇ – ပိူၼ်ႈလႆႈတူၵ်ႇၶိူဝ်းၶိူဝ်း
ၸူးၸႂ်မူၼ်ႈၸႂ်ပျေႃႇ – ၶႂ်ႈၶူဝ်တေႃႇမိူင်းလႅင်း
ၸူးၸႂ်ၵူဝ်ၸႂ်ဢၢႆ – ၶႂ်ႈယူႇလၢႆမူၵ်းႁိူၼ်း
ၸူးၸႂ်ၼၵ်းၸႂ်တိုမ် – လိုမ်းတၢင်းလီတႃႇသေႇ
ၸူးၸႂ်ၶၢၼ်ႉၸႂ်ၼၵ်း – တၵ်းႁဵတ်းသင်ဢမ်ႇဢွင်ႇ
ၸူးၸႂ်ဢူၼ်ႈၸႂ်ဢွၼ်ႇ – ဢမ်ႇႁွၼ်ႇၶႂ်ႈႁဵတ်းသင်
ၸူးၸႂ်ငိူဝ်ႈၸႂ်ငဝ် – ၶႂ်ႈဢဝ်ႁူဝ်တႅတ်ႈၽႃႈ
ၸူးၸႂ်လွမ်ႇၸႂ်ၵူဝ် – တူဝ်ပေႃးၶႂ်ႈမူၵ်းဝႆႉၼႂ်းတိူၵ်ႈ
ၸူႇၸီလႄမႅင်းပူႈ – လိူတ်ႈသူႈဢမ်ႇမိူၼ်ၵၼ်
ၸႂ်ၵူၼ်းလီႁိုဝ်ၸႃႉ – ႁူမ်ႈတၢင်းၵႃႉၸင်ႇႁၼ်
ၸႂ်ၵူၼ်းဢမ်ႇလၢမ်းလႆႈ – ၶႆႈမၵ်ႉသူမ်ႈႁိုဝ် မၵ်ႉဝၢၼ်
ၸႂ်ဢွၼ်ႇမီးတီႈထူင် – ၸႂ်လူင်မီးၼႂ်းတိူၵ်ႈ
ၸႂ်ၵူၼ်းဢမ်ႇႁူမ်ႈထူၺ်ႈ – ၵမ်ႈၽွင်ႈၶႂ်ႈၵိၼ်ၵူၺ်ႈၵပ်းၵိူဝ်
ၸႂ်လမ်ၼွၼ်းဢမ်ႇလပ်း – ၸႂ်ၸပ်းၼွၼ်းဢမ်ႇလႆႈ
ၸႂ်ၸႃႉပေႃးလီ – ၸႂ်ၶီပေႃးသိူဝ်း
ၸႂ်လမ်ဢမ်ႇဢွၼ်ၵျႃႉ – တေႃးသဢမ်ႇဢွၼ်လီ
ၸႂ်လီႁီၵႂၢင်ႈ
ၸႂ်ယႂ်ႇလုၵ်ႈပႄႉၵၢၼ် – ၸႂ်ယႂ်ႇလၢၼ်ပႄႉၶူၵ်ႉ
ၸႂ်ႁၢႆႉမႄးႁႂ်ႈလီ – ၸႂ်ၶီမႄးႁႂ်ႈသိူဝ်း
ၸႂ်ပိုင်ႈမႆႉ မႆႉႁၵ်း – ၸႂ်ပိုင်ႈလၵ်း လၵ်းၵူၼ်ႇ
ၸႂ်ႈတႄႉၸင်ႇၶႆႈ – လႆႈႁၼ်ၸင်ႇဢုပ်ႇ
ၸႂ်ပျေႃႇၸင်ႇပီး – မီးငိုၼ်းၸင်ႇၵႆႉ
ၸႂ်ႉပိူၼ်ႈယႃႇၸႂ်ႉလၢႆ – ၶွင်ၶၢႆယႃႇဢဝ်တွၼ်ႈပီႈၼွင်ႉ
ၸႂ်ႈၵေႃႈဢဝ် – မဝ်ၵေႃႈပႅတ်ႈ
ၸႂ်ႉပိူၼ်ႈၸၢင်ႈႁၢမ်းပဝ်ႇ – ၸႂ်ႉတူဝ်ၵဝ်ႇၸင်ႇဝႆး
ၸႂ်ႉပိူၼ်ႈဢမ်ႇပၼ်ငိုၼ်း – ဝၢႆးလိုၼ်းဢမ်ႇမႃးထႅင်ႈ
ၸႂ်သတ်းဢမ်ႇလၢမ်းလႆႈ – ၶႆႈႁၢႆႉႁိုဝ်တေလီ
ၸဝ်ႈမေႃႈၵိၼ်မေႃႈမၢင်ႈ – ၸၢင်ႈၶမ်းတိုဝ်းၵႂၢင်းတွင်း
ၸဝ်ႈပႅၵ်ႇတၢမ်တႃ – ၸဝ်ႈပႃၵိၼ်ၶီႈ
ၸဝ်ႈၵုပ်းတိုဝ်းတွင် – ၸဝ်ႈၵွင်ႁႆႇမူၵ်ႇ
ၸဝ်ႈၵိၼ်ဝႃႈၸဝ်ႈမၵ်ႉ – ၶႃႈၵိၼ်ဝႃႈၶႃႈႁိတ်ႉ
ၸဝ်ႈလႆႈၼႃႈ – ၶႃႈတေတၢႆ
ၸဝ်ႈၼႃးမွင်းၾူၼ် – ၵူၼ်းၵႃႉမွင်းလႅတ်ႇ
ၸဝ်ႈၼႃးၸူမ်းၽုၼ်ႇ – ၸဝ်ႈၵုၼ်ႇၸူမ်းပွႆး
ၸဝ်ႈသႅင်လၢတ်ႈၵျႃႉ – ၸဝ်ႈမႃႉလၢတ်ႈလီ
ၸဝ်ႈၽၵ်းပႄႉတွၵ်ႇ – ၸဝ်ႈမွၵ်ႇပႄႉတွင်
ၸဝ်ႈၶူဝ်းလၢတ်ႈလႅပ်ႈ – ၸဝ်ႈဢႅပ်ႇလၢတ်ႈၶျေႃး
ၸဝ်ႈဢမ်ႇယွင်ႈၶွင်ဢမ်ႇၵႃႈ – ၸဝ်ႈဢမ်ႇဝႃႈပိူၼ်ႈဢမ်ႇႁူႉ
ၸဝ်ႈယႃႈၸဝ်ႈလဝ်ႈ – ယေႈထဝ်ႈယေႈပႅတ်ႈလၢႆ
ၸဝ်ႈၵုၼ်ႇၸဝ်ႈၶူဝ်း – သိုဝ်ႉယူဝ်းၵေႃႈၶၢႆလႅၼ်
ၸဝ်ႉမၢၼ်ႈတႆႈၾႆး – ၸဝ်ႉတႆးလႅတ်ႇဢွၵ်ႇ
ၸဝ်ႈၼႃးၶႆႈၶိူဝ်းၽုၼ်ႇ – ၸဝ်ႈၵုၼ်ႇၶႆႈၶိူဝ်းပွႆး
ၸင်းၵၼ်ပိူဝ်ႈၽွၵ်ႇဝႃႈ – ၸႃႉၵၼ်ပိူဝ်ႈၵႆႉၼႄး
ၸၢင်ႈပဵၼ်ၸၢင်ႈဝႃႈ – လႆႈၼႃႈၺႃးၵမ်းသၢင်ႇတေႃႇ
ၸၢင်ႈၶမ်းဢမ်ႇၽၢၼ် – ၸၢင်ႈသၢၼ်ဢမ်ႇမီး
ၸၢင်ႈဢုပ်ႇသမ်ႉပဵၼ်ၸွမ်း – ၸၢင်ႈၼွမ်းသမ်ႇလႆႈတႄႉ
ၸၢင်ႈယွၼ်းၸၢင်ႈလႆႈ – ၸၢင်ႈၶႆႈၸၢင်ႈပွင်ႇ
ၸၢင်ႈႁၵ်ႉၸၢင်ႈပႅင်း – ဝၼ်းလႅင်းၸႂ်ပျေႃႇ
ၸၢင်ႈၼႄးၸၢင်ႈပွင်ႉ – ၵႆႉသွင်ႉပၢႆႈၵၼ်
ၸၢင်ႈဢုပ်ႇၸၢင်ႈလူမ်း – ၽႂ်ဢမ်ႇၸူမ်းမိုတ်ႈ
ၸၢင်ႈၸွပ်ႇၸၢင်ႈထၢမ် – ၼၢင်းဢၢမ်ပေႃးႁႆႈ
ၸၢင်ႈထၢမ်ၸၢင်ႈသွပ်ႇ – ၸွပ်ႇလႆႈၶၢဝ်ႇငၢဝ်းလီ
ၸၢင်ႈသွၵ်ႈၸၢင်ႈၺႃး – သိုဝ်ႉမႃးၶၼ်ထုၵ်ႇ
ၸၢင်ႈႁႃဢမ်ႇလိုဝ်ႈ – သိုဝ်ႉလႆႈၼမ်ၼမ်
ၸၢင်ႈယွင်ႈၶွင်ၶၢႆ – လႆႈငိုၼ်းလၢႆမိုၼ်ႇ
ၸၢင်ႈလၢတ်ႈယွမ်ႉၸႂ် – ၽႂ်ငိၼ်းၵေႃႈယုမ်ႉ
ၸၢင်ႈတွပ်ႇထဵင်ၸႃး – ၵႂၢမ်းႁႃးဢမ်ႇယမ်
ၸၢင်ႈယွင်ႈၸၢင်ႈယေႃး – ၶွင်ပေႃးလႆႈၶၢႆၵႃႈ
ၸၢင်ႈလႆႈဢမ်ႇမေႃၵိၼ် – လုတ်ႈတူၵ်းလိၼ်ႁၢမ်းပႅတ်ႈ
ၸၢင်ႈလိူၵ်ႈလႆႈဢၼ်လီ – ၸၢင်ႈသီလႆႈဢၼ်ၵဵင်ႈ
ၸၢင်ႈဝွၼ်းပိူၼ်ႈၵုမ်ႉ – ၸၢင်ႈယုမ်ႉပိူၼ်ႈၸူမ်း
ၸုၵ်းလပ်ႉလႅတ်ႇ – ၵႅတ်ႇလပ်ႉလူမ်း
ၸဵဝ်းမႃးသမ်ႉလႃႇ – ၵႂႃႇႁိုင်သမ်ႉပွင်ႉ
ၸဵဝ်းမီးၸဵဝ်းၽၢၼ် – ႁဵတ်းၵၢၼ်ဢမ်ႇႁူႉၽၢႆႇ
ၸိူဝ်းႁႃလႆႈဢမ်ႇယၢပ်ႇ – ၸိူဝ်းႁၢပ်ႇၼၵ်းတေတၢႆ
ၸိူဝ်းပေႃႉဢမ်ႇတွင်းဝႆႉ – ၵေႃႉၸဵပ်းၼႆႉဢမ်ႇလိုမ်း
ၸိူဝ်ႉၽႂ်ၵေႃႈလႆႈမၼ်း – မၢၵ်ႇၶိူဝ်ၶၼ်းလႆႈတူၼ်ႈ
ၸဵပ်းမီးတီႈလႂ် – ၸႂ်မီးတီႈၼၼ်ႈ
ၸဵပ်းတူဝ်ယႃႇၸဵပ်းၸႂ် – ၽႂ်ဝႃႈသင်ယႃႇမူမ်ႇ
ၸဵပ်းၵေႃႈၸဵပ်းၼင်ႇၵၼ် – ယႃႇပၼ်ပိူၼ်ႈတၼ်းတွႆႇ
ၸဵပ်းတူဝ်ပၢႆႈလွတ်ႈလႆႈ – မႆႈၸႂ်ဢမ်ႇၸၢင်ႈဝႄႈ
ၸေႃႉၼမ်ႉလႆႈပႃးတူဝ် – လႃႇၽူဝ်တိူဝ်ႉပႃးမေး
ၸွႆႈၵၼ်ၸွင်ႇလႆႈ – မႆႈၵၼ်ဢမ်ႇလီ
ၸွႆႈၵၼ်ၵိၼ်ၸင်ႇဝၢၼ် – ၸွႆႈၵၼ်ႁၢမ်ၸင်ႇမဝ်
ၸိူၵ်ႇၶၢတ်ႇၵေႃႈႁိူဝ်းလႆ – မႆလုတ်ႈၵေႃႈၶဵမ်ဢွၵ်ႇ
ၸိူၵ်ႈသၢမ်ၵိဝ် – ယေႈလိဝ်ယေႈၶႅၼ်းမၼ်ႈ
ၸၢႆႇၽူဝ်ႉၸၢႆႇၽ – ၵႃႉဢမ်ႇတွၼ်ႉလိူဝ်
ၸၢႆႇၽူဝ်ႉၸၢႆႇၽ – ၵ မျၢတ်ႈၵေႃႈဢရၢင်းႁၢႆ
တွၼ်ႈ (ၸ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (သ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(သ)
သ ၽၵ်းၵႆႉၶဝ်ႈၵၢတ်ႇ – တႃမၢတ်ႇၵႆႉၶဝ်ႈသူၼ်
သ ၽႃႇဝဢမ်ႇလႅင်း – လၢတ်ႈၵႂၢမ်းႁႅင်းပိူင်ႈၾိင်ႈ
သ ၽေႃးတြႃးဢမ်ႇပွင်ႇ – ယိူင်ႈၵူၼ်းယွင်ႇထဵင်ၵၼ်
သ ၽေႃးပရမၢတ်ႈဢမ်ႇႁၼ် – ယိူင်ႈတႃတၼ်မွတ်ႇလိပ်ႈ
သႃႇၽၢႆႇႁဝ်းဢိတ်းဢိတ်း – ၽိတ်းၽၢႆႇပိူၼ်ႈၼမ်ၼမ်
သႃႇပၼ်ပိူၼ်ႈၼမ်ၼမ် – ၵမ်းလိုၼ်းလႆႈမၢတ်ႇၼီႈ
သႃႇတီးတူဝ် – ၵူဝ်မႃးၼၵ်းတီႈၸႂ်
သႃႇၵႂႃႇၵမ်းဢိတ်းဢိတ်း – ႁိုင်မႃးၽိတ်းႁူဝ်ၸွႆႉ
သီႇသူပ်းၶိတ်းၸၢင်ႈပွင်ႉ – သီႇသူပ်းမွင်ႉၸၢင်ႈထဵင်
သေးလၢႆၽၵ်းတွင်ႉလူႉ – သေးလၢႆၸူႉႁၢမ်းၼွၼ်း
သႄႉၽၢႆႇၼႃႈ – ၶႃႉၽၢႆႇလင်
သႂ်ႇၸႂ်ႁဵတ်းယင်ႈယၢပ်ႇ – လႃႈလီႈတၢပ်ႇသမ်ႇပဵၼ်
သႅင်လီဢမ်ႇမီးၵူႈပႃႇ – ၼၢမ်ႇသႃႇဢမ်ႇမီးၵူႈလွႆ
သုၼ်ႇလီလူဝ်ႇမေႃၵျၢမ်ႇ – ၵၢမ်ႇလီလူဝ်ႇမေႃပွင်
သုၵ်ႈႁႂ်ႈၸၢင်ႇ – လၢင်ႉႁႂ်ႈၵဵင်ႈ
သူၼ်လီလူဝ်ႇမေႃၽုၵ်ႇ – လုၵ်ႈလီလူဝ်ႇမေႃၸႂ်ႉ
သုမ်ႉတေလူႉပႄၸိူၼ်း – ႁိူၼ်းတေလူႉသဝ်ၶၢတ်ႇ
သိုၵ်းတႄႉဢမ်ႇၵႃႈႁိုဝ် – ၵူဝ်ဢၢႆႈတိုဝ်ၵဝ်းၸွမ်း
သွၼ်ၵႂၢမ်းၶႃႉၶၢႆ – ၺၢၼ်ႇၽၢႆတွင်းၸႃး
သွၼ်ၵႂၢမ်းတြႃး – ႁႃးသမ်ႉဢမ်ႇတွင်းလႆႈ
သွၼ်ပိူၼ်ႈဢမ်ႇလႆႈ – ဝႆႉသွၼ်ၸႂ်ၵဝ်ႇ
သွၼ်သင်ႁူႉၼၼ်ႉ – ၵၼ်ႉၸိုၼ်ႇပၢၼ်တၢႆ
သွၼ်ယဝ်ႉဢမ်ႇၶိုၼ်းဝူၼ်ႉ – သွၼ်ပူၼ်ႉယဝ်ႉလိုမ်းၸွမ်း
သွၼ်ႁၢင်လိုမ်းႁူဝ် – ၵွႆးၵူဝ်တေၸဵဝ်းလႆႈ
သွၼ်ႁူဝ်လိုမ်းႁၢင် – ၵူႉသူလ်ႇမၢင်ဝူတ်ႈၼၵ်း
သွၼ်ယဝ်ႉဢမ်ႇတွင်းၵိုမ်း – ႁိုင်မႃးလိုမ်းပႅတ်ႈသဵင်ႈ
သိုဝ်ႉငၢႆႈ – ၶၢႆၸင်ႇဝႆး
သိုဝ်ႉယဝ်ႉၶၼ်ၶိုၼ်ႈ – ၼႃႈၸိုၼ်ႈတႃဝၢၼ်
သိုဝ်ႉယဝ်ႉၶၼ်လူင်း – ၵိုတ်းသူင်းၼႃႈဢူၼ်ႈ
သိုဝ်ႉၶဵဝ်ၸၢင်ႈလႆႈလူမ်း – ၸူမ်းၸိုၵ်းပဵၼ်ၵွင်ၼီႈ
သိုဝ်ႉယဝ်ႉထၢင်ႇပႅတ်ႈလၢႆ – ဝၢႆးမႃးပိူၼ်ႈၸူမ်းၶႆႈ
သိုဝ်ႉၽိတ်းဢမ်ႇသုမ်းလၢႆ – ၶိုၼ်းၶၢႆပေႃးလႆႈယူႇ
သိုဝ်ႉၽိတ်းယႃႇမႆႈ – ၶႆႈမျၢတ်ႈဢမ်ႇယၢပ်ႇ
သိုဝ်ႉၶဝ်ႈလႆႈပႃးယေး – ဢဝ်မေးလႆႈပႃးလုၵ်ႈ
သိုဝ်ႉဝႆႉၶၢႆလုမ်း – ပေႃးသုမ်းယႃႇပွႆႇ
သိုဝ်ႉဝႆႉၶၢႆယွႆႈ – ၵွႆႈႁိုင်ၵွႆႈသုမ်း
သိုဝ်ႉၽူႇၽႃႇ – ၼႃႇႁဝ်းၶိုၼ်း
သိုဝ်ႉယဝ်ႉပႆႇပၼ်ငိုၼ်း – တိုၼ်းဢမ်ႇလႆႈၸႂ်ယႂ်ႇ
သိူဝ်ပႆႇတၢႆ – ပၢင်တၢႆးပုတ်ႈ
သိူဝ်ႈၶူဝ်းယွၵ်း – ဢွၵ်းငိုၼ်းမၢၵ်ႈ
သိူဝ်ႁၢႆႉ – ယႃႇၶိူင်းၵၢမ်ႇ
သိူဝ်ႈမႂ်ႇလိူမ်ႈၽၢၼ်ၽၢၼ် – ၶဝ်ႈသၢမ်ဢမ်ႇတဵမ်ပုင်း
သၢမ်ဢမ်ႇလီ သီဢမ်ႇယဝ်ႉ – ၵဝ်ႈဢမ်ႇထူး
သၢမ်ပႆႇလီ သီႇပႆႇၵျႃႉ – ႁႃႈတွႆႇလႅဝ်
သၢမ်ပွၵ်ႈလီ သီႇပွၵ်ႈၸႃႉ – ႁႃႈပွၵ်ႈၽိတ်းၵၼ်
သၢမ်ၵေႃႉဝႃႈဢမ်ႇလီ – သီႇၵေႃႉဝႃႈဢမ်ႇၵျႃႉ
သုမ်ႈဢုမ်ႈမႃလၵ်ႉၶူပ်း – ၵူၼ်းဢမ်ႇသူပ်းၸၢင်ႈႁၢႆႉ
သူပ်းလီၵႂၢမ်းငၢမ်း – ထိုင်ယၢမ်းၸင်ႇလၢတ်ႈ
သူပ်းဢူၼ်ႈသဵင်ဢွၼ်ႇ – ဢမ်ႇႁွၼ်ႇၸႂ်လမ်
သူပ်းလီသဵင်ဝၢၼ် – ၶၢၼ်ၵမ်းလႂ်ၵေႃႈလီထွမ်ႇ
သူပ်းၵေႃႈၸၢင်ႈ – ႁၢင်ႈၵေႃႈၸွမ်း
သူမ်းယဵၼ်ႇၵႂၢမ်းငႄႈ – ပေႃႈမႄႈႁၵ်ႉတွၼ်းၸႂ်
သူပ်းၸၢင်ႈယေႃး – ၶေႃးၵိၼ်ဢိမ်ႇ
သူပ်းၸၢင်ႈဝႃႈ – မႃႇပႆလၢႆ
သူပ်းမေႃၶၢၼ် – ၵၢၼ်မေႃႁဵတ်း
သူပ်းၸၢင်ႈႁၢင်ႈလီ – လၢတ်ႈတင်းပီဢမ်ႇပႃးၵႂၢမ်းၸႃႉ
သူပ်းႁၢႆႉပၢၵ်ႇၽၢႆ – ထၢမ်ဢဝ်တၢႆတႃႇသေႇ
သူပ်းႁၢဝ်ႈသဵင်ၵျၢမ်း – တင်းဢၢမ်းတင်းလႃႇ
သူပ်းဝႆးပၢၵ်ႇမႆႈ – ၶႆႈပေႃးဢမ်ႇတၼ်းဢိုၼ်ၼမ်ႉလၢႆး
သူပ်းၸႃႉသဵင်ၸၢင် – တႃၶႂၢင်ၸၢႆႉၽၢႆႉ
သူပ်းၸႃးငႃးၽၢႆ – ဢမ်ႇၵူဝ်တၢႆသေပွၵ်ႈ
သူပ်းမႆႈၵႂၢမ်းၶႅင် – တႃလႅင်ပၢၵ်ႇၶၢၵ်ႇ
သူပ်းပႄႉၵႂၢမ်းပေႃး – ပဵၼ်တေႃးသတႃႇသေႇ
သူပ်းၼမ်ၵႂၢမ်းၶိူဝ်း – ၼမ်ႉလၢႆးပိူဝ်းၽူင်ႉသင်ႈသင်ႈ
သူပ်းယွႆႈၵႂၢမ်းယႂ်း – ၼႄးပိူၼ်ႈၽႂ်းၼႃႇ
သူပ်းဝၢၼ်ၵူၼ်ႈသူမ်ႈ – ယႃႇႁူမ်ႈဢမ်ႇလီ
သဵင်ၶူဝ်ၼႆႈ – သဵင်ႁႆႈပူင်း
သဵင်လၢတ်ႈၼူဝ် – သဵင်ၶူဝ်မူၼ်ႈ
သဵင်လၢတ်ႈၵေႃႈဝၢၼ် – ႁဵတ်းၵၢၼ်ၵေႃႈၵတ်ႉ
သဵင်ၸႂ်ႈ ၶေႃႈဢမ်ႇၸိုဝ်ႈ
သဵင်လၢတ်ႈပိူၼ်ႈလီၵူဝ် – သဵင်ၶူဝ်ပိူၼ်ႈလီမိူဝ်ႇ
သဵင်လၢတ်ႈပူၼ်ႉတူဝ် – သဵင်ၶူဝ်ပူၼ်ႉမၢၼ်ႈ
သဵင်လၢတ်ႈမေႃးပၢပ်ႇပၢပ်ႇ – ဝႃႈယၢပ်ႇသမ်ႉသွၼ်ၶႅင်
သူတ်ႉမႆႈဢမ်ႇလႆႈတူဝ် – ၶူဝ်ဝႆးၵႆႉဢၢႆပိူၼ်ႈ
သၢၼ်မိုဝ်းယွင်ႈၵူၼ်ႈၵဝ်ႇ – ၵွတ်ႇႁူဝ်ၶဝ်ႇၵေႃႉလဵဝ်
သဵင်လီဢမ်ႇမီးၵူႈပႃႇ – ၼၢမ်ႇသႃႇဢမ်ႇမီးၵူႈလူင်
သၼ်ႇထေႇပဵၼ်မႃး – မႄးယႃဢမ်ႇလႆႈ
သုၼ်ႇလီလႆႈမျၢတ်ႈ – လၢတ်ႈလႅပ်ႈပိူၼ်ႈယုမ်ႇ
သူၼ်ႁူၵ်ႉပဵၼ်ပႃႇၶႃး – ၼႃးႁူၵ်ႉပဵၼ်ပႃႇယိူဝ်ႈ
သိူဝ်သိူင်ႇၺၢၼ်ႇ – ဢမ်ႇတၢၼ်ႇပၢင်တၢႆလိုမ်း
သဵတ်ႈၼူၵ်ႇယွၼ်းၸႃး – ဝၢႆးမႃးပိူၼ်ႈယွၼ်းၵႃႈၵႃႈ
သဵတ်ႈႁၢႆႉပိူၼ်ႈဢမ်ႇယွမ်း – ၼွမ်းႁၢႆႉပိူၼ်ႈဢမ်ႇလႃႇ
တွၼ်ႈ (သ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ၺ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ၺ)
ၺႃးမိူဝ်ႈၵုသူလ်ႇၶိုၼ်ႈ – မၢၵ်ႇဢိုၼ်ႈလႅၵ်ႈၶမ်ႈၶူင်း
ၺႃးမိူဝ်ႈသုၼ်ႇႁဝ်းႁႅင်း – မိူင်းလႅင်းပိူၼ်ႈမႃးသူင်ႇ
ၺႃးမိူဝ်ႈသုၼ်ႇႁဝ်းလီ – ၼီႈသၢမ်ပီၶိုၼ်းလႆႈ
ၺႃးမိူဝ်ႈသိူဝ်တိုၵ်ႉဝႅၼ် – ပၢင်တၢႆးလႅၼ်ဢမ်ႇလႆႈ
ၺႃးမိူဝ်ႈသုၼ်ႇႁဝ်းပွၵ်း – ၶွင်ယွၵ်းသိုဝ်ႉၵႃႈယႂ်
ၺႃးမိူဝ်ႈသုၼ်ႇႁဝ်းယူႈ – ပိူၼ်ႈၵူႈဢမ်ႇၶိုၼ်းတႅၼ်း
ၺႃးယၢမ်းၵႅၼ် – ပိူၼ်ႈလႅၼ်ၵေႃႈၸဵဝ်းယုမ်ႇ
ၺႃးမိူဝ်ႈသုၼ်ႇႁဝ်းလူင်း – ၶၢႆၶမ်းၶူင်းပဵၼ်မၢၵ်ႇဢိုၼ်ႈ
ၺႃးၽွင်းမီးသုၼ်ႇ – သိုဝ်ႉၵုၼ်ႇယဝ်ႉၶၼ်ၶိုၼ်ႈ
ၺႃးမိူဝ်ႈၵႂၢင်တိုၵ်ႉမူပ်ႇ – ယုၵ်ႉၵွင်ႈတူပ်ႇဝႆးဝႆး
ၺႃးငူးမၢၼ် – ၺႃးၽၢၼ်းၵႅၼ်
ၺႃးလႅတ်ႇသမ်ႉယၢမ်ႈ – ၾႃႉၵၢမ်ႈသမ်ႉၵႅၼ်
ၺႃးၶွင်လီ – ၶီၸႂ်ဢမ်ႇမီးငိုၼ်းတေသိုဝ်ႉ
ၺႃးမိူဝ်ႈၽီလပ်ႉတႃ – ၽႂ်ႁႃဢမ်ႇႁၼ်လႆႈ
ၺမ်းယွႆႈပိူၼ်ႈလွႆးလွႆး – ဝၢႆးပွႆးၸင်ႇဢဝ်ဢွၵ်ႇ
ၺၢၼ်ႇမႄႈမွႆႈ – ဢမ်ႇလၢတ်ႈယွႆႈ – ပႂ်ႉတၢပ်ႇမိူဝ်ႈလိုမ်းတူဝ်
ၺၢၼ်ႇလီၸင်ႇၵေႃႉၸၢႆး – လၢႆးလီၸင်ႇပႄႉပိူၼ်ႈ
ၺၢၼ်ႇၼိုၵ်းဢမ်ႇမိုင်ႉ – ၺၢၼ်ႇထိုင်ႉဢမ်ႇၽၢႆ
ၺၢၼ်ႇထိုင်ႉ ၼၢၵ်ႈဢဝ်ႁိူဝ်ႇပေႃးယမ်း – ၺၢၼ်ႇၽၢႆႁဵတ်းၵမ်းၼိုင်ႈပေႃးယဝ်ႉ
ၺေႃႇမိူင်းမၢၼ်ႈ – ႁၢႆႉလိူဝ်ၽိူဝ်ႉမိူင်းတႆး
ၺီႇဝႃးပႃးၽွမ်ႉ – ယွမ်ႉသီဢၼ်လဵဝ်
ၺၢၼ်ႇလီဢမ်ႇၽၢၼ် – ၵၢၼ်လီဢမ်ႇၵွတ်း
ၺၢၼ်ႇထိုင်ႉသွၼ်လိူၼ်ပၢႆ – ၺၢၼ်ႇၽၢႆသွၼ်ဝၼ်းၼိုင်ႈ
ၺၢမ်ႉတေႃႇၺၢမ်ႉ – သၼ်ႇၸၢမ်ႉၸၢမ်ႉၸူးၵၼ်
တွၼ်ႈ (ၺ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (တ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(တ)
တ ႁဝ်းဢမ်ႇလႆႈဢိူဝ်ႇ – ၽိူဝ်ႇၼၼ်ဢမ်ႇလႆႈၵိၼ်
တ ႁဵတ်းၼၼ် – ဢမ်ႇတၼ်းၵိၼ်ၵတ်ႉၵႃႈ
တ ႁဝ်းဢမ်ႇလႆႈၼႃႈ – ၵတ်ႉၵႃႈၵိၼ်ဢွၼ်တၢင်း
တ ဢဝ်ဢမ်ႇလႆႈသႆႉ – တ ဝႆႉဢမ်ႇလႆႈသိမ်း
တႃႁဝ်းတူၺ်းၵွၼ်ႇ – ယႃႇႁွၼ်ႇဢုပ်ႇလူင်
တႃႁဝ်းဢမ်ႇၸႅင်ႈ – ဢုပ်ႇထႅင်ႈပဵၼ်လူမ်း
တႃတူၺ်းတႂ်ႈ – ၸႂ်ဝူၼ်ႉသုင်
တႃလမ်ႁၼ်ငိုၼ်းၽိူၵ်ႇ – ၸၢင်ႈမိူၵ်ႈႁၢႆႉတေႃႇၵၼ်
တႃၽိတ်းဝႃႈၸၢမ်းၵၢမ်ႇ – တႃႉၶၢမ်ႇသုမ်းလၢႆလၢႆ
တႃသွင်ၶွၼ်ဢိၵ်ႇၵၢင်ဝၼ်းလုၵ်ႈၼိုင်ႈ
တႃႇပိူၼ်ႈတေလူႉၼၼ်ႉ – မၼ်းဢမ်ႇၸႂ်ႈပုၼ်ႈႁဝ်းလီ
တႃႇႁဝ်းတေလီၼႆႉ – ယႃႇဝႆႉႁႂ်ႈပိူၼ်ႈလု
တိၵေႃႈၸတ်ႉ – ႁတ်ႉၵေႃႈတႅၵ်ႇ
တီႈၶူမ်းဢမ်ႇယၢႆး – တီႈၵၢႆးဢမ်ႇတိူၼ်ႇ
တီႈၶႅၼ်ႈၵူႈလႆႈ – တီႈမႆႈယႃပၼ်
တီႈတႅမ်ႇယႃႇလၢၼ်း – တီႈၸၢၼ်းယႃႇၸွၼ်ႉ
တီႈႁၢႆႉယႃႇၵႂႃႇ – တီႈသႃႇလူဝ်ႇထင်
တီႈမၢၼ်ႈၵေႃႈၵွင်း – တီႈၵျွင်းၵေႃႈသႃႇ
တီႈပိုင်ႈႁဝ်ႈယႃႇၶႃႉ – တီႈမႃႉႁဝ်းယႃႇထဵင်
တီႈၵိၼ်ယႃႇႁႂ်ႈၶွၼ်း – တီႈၼွၼ်းယႃႇႁႂ်ႈႁေႈ
တီႈတုၵ်ႉၶႃႉယူႇ – သူယႃႇၵႂႃႇၸူး
တေၼင်ႈႁႂ်ႈတူၺ်းလုၵ်း – တေၸုၵ်းႁႂ်ႈတူၺ်းၶႃႇ
တေပႆတူၺ်းၽၢႆႇ – တေဝၢႆႇတူၺ်းတၢင်း
တေယၢင်ႈတူၺ်းတိၼ် – တေၵိၼ်တူၺ်းတီႈ
တေဢွၵ်ႇၵႃႉလူဝၼ်း – တိုၼ်းဢမ်ႇတၼ်းၵိၼ်ပိူၼ်ႈ
တေသိုဝ်ႉထွမ်ႇၶၼ်ၶၢႆ – တေၶၢႆထွမ်ႇၶၼ်သိုဝ်ႉ
တေၵႃႉတူၺ်းပေႇတၢင်ႇ – သုၼ်ႇသမ်ႉၶႅၼ်းပုၵ်း
တေၵိၼ်ယႃႇဢႃးၼႃႇ – တေၵႂႃႇယႃႇပွင်ထိူင်း
တေလၢတ်ႈဢိုၼ်ၼမ်ႉလၢႆး – ၵေႃႉၸၢႆးဝူၼ်ႉၸွတ်ႇၸွတ်ႇ
တေၶီႈၸင်ႇႁႃႁူးလွင်ႈ – ၶွင်ႈသင်ဢမ်ႇတၼ်းတူၺ်း
တၢင်းလၢတ်ႈၵေႃႈသႃႇ – တၢင်းၵႂႃႇၵေႃႈလိူင်ႇ
တၢင်းႁဵတ်းၵႂၢင်ႈ – တၢင်းဢၢင်ႈယႂ်ႇ
တၢင်းဝူၼ်ႉဢမ်ႇႁူမ်ႇငိူၼ်ႈ – ပိူၼ်ႈလၢတ်ႈႁဝ်းယႃႇၶတ်း
တၢင်းႁၼ်ဢမ်ႇႁူမ်ႇသဵၼ်ႈ – ယႃႇတၢပ်ႈလဵၼ်ႈႁဵတ်းႁူၺ်း
တၢင်းၵျၢမ်ႇဢမ်ႇႁူမ်ႈသၢႆ – ယႃႇၵႃႉၶၢႆႁူမ်ႈၵုၼ်ႇ
တၢင်းၵိၼ်ဢမ်ႇမႃးမိူဝ်ႈသႃႇ – တၢင်းၵႂႃႇဢမ်ႇမႃႈမိူဝ်ႈတၼ်း
တၢင်းပႆဢမ်ႇပႂ်ႉမီးမၢၵ်ႈ – ဢသၢၵ်ႈဢမ်ႇထႃႈၶိင်ႇယၢမ်း
တၢင်းၵျၢမ်ႇပႆႇမူတ်း – ဢသၢၵ်ႈယူတ်း
တၢင်းလၢတ်ႈၵျၢင်ႇ – တၢင်းထၢင်ႇၵေႃႈမႅၼ်ႈ
တၢင်းလူႇဢမ်ႇမီး – တၢင်းထၢင်ႇၵေႃႈမႅၼ်ႈ
တၢင်းႁဵတ်းဢမ်ႇဝၢႆႈလႆႈ – ၶႆႈၸႂ်ဢမ်ႇၸၢင်ႈသုတ်း
တၢင်းမၵ်ႉဢမ်ႇႁူမ်ႈလၢႆး – ယႃႇၵိၼ်ငၢႆးႁူမ်ႈမူႇ
တၢင်းထၢင်ႇဢမ်ႇႁူမ်ႈၵၼ် – ႁၼ်ၶူဝ်းယႃႇႁူမ်ႈသိုဝ်ႉ
တၢင်းၸႃႉဢမ်ႇမီး – တၢင်းလီဢမ်ႇသဵင်ႈ
တၢင်းလၵ်းလူမ်ႉၸဝ်ႈၵုၼ်ႇ – တၢင်းသုၼ်ႇလူမ်ႉၸဝ်ႈသႅင်
တၢင်းႁဝ်းၶႂ်ႈၼႃႇၼႃႇ – ယႃႇႁႂ်ပိူၼ်ႈလႆႈၼႄး
တၢင်းလႂ်ယႃႇႁႂ်ႈသႃႇ – ၼႃႇတၢင်းလႂ်ဢမ်ႇလီ
တၢင်းၼွၵ်ႈႁမ်ႉယွၵ်းယွၵ်း – ပႃႈၼႂ်းဢွၵ်းငိုၼ်းမၢၵ်ႈ
တၢင်းလၢတ်ႈဢမ်ႇႁူမ်ႈႁွႆး – ယႃႇပေတွႆးၵၼ်လႄႇ
တၢႆၼႆႉၽႂ်ၵေႃႈၵူဝ် – ႁၵ်ႉတူဝ်ၵဝ်ႇလိူဝ်ပိူၼ်ႈ
တူဝ်ဢမ်ႇပႆ – ၽႆးဢမ်ႇလုၵ်ႉ
တူဝ်တၢႆ – လၢႆးဢမ်ႇၼဝ်ႈ
တူဝ်ၼင်ႈႁၢင်လႄႇ – ယေႈၶႅၼ်းသႄႇၵႆ
တူဝ်ဢမ်ႇတူင်ႉ – ၶွၼ်ႉၽူင်ႉၸွတ်ႇၵူႈၽၢႆႇ
တူဝ်ၼိမ်ႁၢင်ၶွၼ်း – ၸွၼ်းၽႅဝ်ၵူႈတီႈ
တူဝ်ဢမ်ႇပႆ – ႁၢင်ၵႂၵ်းၵႆၸွတ်ႇၸႅတ်ႇ
တူဝ်ပႆတၢႆ – ဢၢႆမဵၼ်ပေႃးဢွၵ်ႇ
တူဝ်လဵၵ်ႉၵိၼ် – တူဝ်လဵၵ်ႉၶေႇ
တူဝ်လႂ်ၽိတ်း – မိတ်းတူဝ်ၼၼ်ႉ
တိူဝ်ႉၸႂ်ၸဵဝ်းယွမ် – တွမ်ၸႂ်ၸဵဝ်းပီး
တိူဝ်ႉၸႂ်မႂ်တူဝ် – ၵူဝ်ၽႅဝ်ၸၢင်ႈယွင်ႇ
တိူဝ်ႉၸႂ်ၼွၼ်းဢမ်ႇလႆႈ – မႆႈၸႂ်ၼွၼ်းဢမ်ႇလပ်း
တိူဝ်ႉၵေႃႈၵဝ်ႇ – ပဝ်ႈၵေႃႈယွၵ်ႈ
တိူဝ်ႉတီႈလႂ် – ၸႂ်လီတီႈၼၼ်ႈ
တိူဝ်ႉၵေႃႉၼိုင်ႈ ႁႆႈတင်းႁိူၼ်း – တၢႆႁိူၼ်းၼိုင်ႈ ႁႆႈတင်းဝၢၼ်ႈ
တိူဝ်ႉတူဝ်ၽႂ် – မႆႈၸႂ်မၼ်း
တူၺ်းၼမ်ၼမ် – သိုဝ်ႉဢေႇဢေႇ – ယႃႇၵူဝ်သရေႇသုမ်း
တူၺ်းလုပ်ႉလၢပ်ႉဢမ်ႇလီ – ၸၢင်ႈလႆၶီမိူဝ်းၼႃႈ
တူၺ်းဝၼ်းၸင်ႇၵိၼ်ၶႅၵ်ႇ – ပိူၼ်းမႅၵ်ႇၵွင်ႈမႃးၺွပ်း
တူၺ်းဝၼ်းယဝ်ႉၸင်ႇဢဝ် – ၺႃးၶွင်မဝ်ၵႃႈဢေႇ
တူၺ်းဝၼ်းယဝ်ႉၸင်ႇၵႂႃႇ – လွတ်ႈပႃႇလႃႇႁၢမ်းၵိၼ်
တူၺ်းတီႈၵိူတ်ႇၸင်ႇတၢႆ – တူၺ်းတီႈၶၢႆၸင်ႇသိုဝ်ႉ
တူၺ်းဝၼ်းၵႂႃႇၸၢင်ႈႁၢမ်း – ပႂ်ႉဝၼ်းႁႃၸၢင်ႈလုတ်ႈ
တူၺ်းယဝ်ႉတူၺ်းထႅင်ႈ – ၸင်ႇၸႅင်ႈတီႈၼႄးမၼ်း
တူၺ်းပႃႈၺၢၼ်ႇ – ဢၢၼ်ႇပႃးတွင်း
တူၼ်ႈၽၵ်းလိူဝ်ႇ – ၽိူဝ်ႇတၢင်းပိူၼ်ႈလၢႆလၢႆ
တူတ်းႁႂ်ႈမႃၸႂ်လီ – ၶီႈႁႂ်ႈမႃၸဵဝ်းမိုတ်ႈ
တူတ်းၼႂ်ႈၽႃႈ – ၵႃႈၼႂ်းလုၵ်းၼွၼ်း
တူၵ်းလိုၼ်းၸူဝ်ႈၾႃႉမႅပ်ႈ – လႅပ်ႈဢမ်ႇတၼ်းလႆႈၵိၼ်
တူၵ်းလိုၼ်းဢမ်ႇလႆႈလွင်ႈ – ပိူၼ်ႈယွင်ႈၵႂႃႇႁဝ်းႁၢမ်း
တူၵ်းလိုၼ်းဢိတ်းဢိတ်း – ၽိတ်းငိုၼ်းလၢႆမိုၼ်ႇ
တူၵ်းၵေႃႈမၢင်ႈ – ဝၢင်းၵေႃႈတႅၵ်ႇ
တူၵ်းၸႂ်တၢၼ်ႇၽႃႉသပ်းလင် – ၵႂင်ၸႂ်တၢၼ်ႇပူပၢႆႈၼီႈ
တူပ်းႁႂ်ႈလၢပ်ႇ – တၢပ်ႇႁႂ်ႈၵူဝ်
တဵၵ်းယေႈၶႅၼ်းၵွင်ႇ – ယွင်ႈယေႈၶႅၼ်းၼႅမ်း
တဵၵ်းၼမ်ႉႁူမ်ႈတႃႈ – ယႃႇဝႃႈၵႂၢမ်းၶတ်းၵၼ်
တၢၵ်ႇၽႃႈ – ထႃႈၼၢႆးလူင်း
တၼ်းဢွၼ်ၸူဝ်ႈလွၵ်ႈယႃႈ – ၵတ်ႉၵႃႈၸွမ်းၵမ်းလဵဝ်
တေႃၵၢင်တၢင်းသၢၵ်ႈၽႃႉ – ႁဵတ်းလွင်ႈၸႃႉသၢၵ်းၵႂၢမ်း
တေႃးသႃႉဢမ်ႇဢွၼ်လီ – တၢင်းၶီဢမ်ႇဢွၼ်သႃႇ
တွင်ႉဝႃႈပေႃး – ၶေႃးယင်းပႆႇဝႃႈဢိမ်ႇ
တွင်ႉၶိုၼ်ႈတၢၼ်ႇတေတၢႆ – ပေႃးႁၢႆတၢၼ်ႇႁဵတ်းလဵၼ်ႈ
တွင်ႉၾႃႉလၼ်ႇတူၵ်းမႃး – ၵူၼ်းၶႃယၢဝ်းတေၵမ်ႉ
တွင်ႉမႆႈၶဝ်ႈၸႂ်ပွတ်း – ၵွတ်းမႃးတေႃးသႃႉယႂ်ႇ
တွင်ႉၶိုၼ်ႈတၢင်မႄႈမၢၼ်း – ဢၢၼ်းမေႈပၼ်မၢဝ်ႇထဝ်ႈ
တွင်ႉဢမ်ႇတၼ်ၼင်ႇၶႃ – ႁႃၵိၼ်ၸင်ႇတေလႆႈ
တွမ်ပၢၵ်ႇၽူႈယိင်း ၼုင်ႈသိၼ်းလၢႆး – တွမ်ပၢၵ်ႇၽူႈၸၢႆး ၼုင်ႈၵူၼ်ၵွမ်ႈ
တၢႆတေႃႇတဵင်ႉ – ၽႂ်ဢမ်ႇလဵင်ႉၶဝ်ႈၽႂ်
တိၼ်မိုဝ်းပဵၼ်ၶႃႈတွင်ႉ – ပိူၼ်ႈဢမ်ႇႁွင်ႉပၼ်လၢႆ
တၢၼ်ႇၶူဝ်ႁႂ်ႈယုမ်ႉ – တၢၼ်ႇယုမ်ႉႁႂ်ႈႁၢႆလၢႆ
တွႆႇၸင်ႇလင် – မင်ၸင်ႇမေႃး
တွၼ်ႈ (တ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ထ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ထ)
ထ လုၵ်ႈယႃႇဝႃႈၸေး – ထႃႉမေးယႃႇဝႃႈၸွတ်ႇ
ထ ဝူဝ်းၵႂၢႆးယႃႇလႃႇ – ၸၢင်းၼႃႇၶိုၼ်းတူဝ်ႁဝ်း
ထ ပိူၼ်ႈဝူၼ်ႉၶို်ၼ်းတူဝ် – ၶူဝ်ပိူၼ်ႈဝူၼ်ႉၸႂ်ၵဝ်ႇ
ထ ၵၼ်ပိူဝ်ႈၼပ်ႉလၢတ်ႈ – မၢတ်ႈၵၼ်ပိူဝ်ႈၼပ်ႉယမ်
ထ ၵၼ်ၸၢင်ႈသွင်ႉ – ပွင်ႉၵၼ်ၸၢင်ႈပၢႆႈ
ထႃႈၵိၼ်မိူင်းလႆႈယူႇ – ထႃႈမူႇၶဝ်ႈၽၵ်းယဵၼ်
ထႃႈပိူၼ်ႈလၢတ်ႈသုတ်းယဝ်ႉ – ႁဝ်းၶႂ်ႈဢုပ်ႇၸင်ႇဢုပ်ႇ
ထႃႈႁႅင်းပိူၼ်ႈႁၢမ်းပဝ်ႇ- တူဝ်ၵဝ်ႇလုၵ်ႉၸင်ႇၽၢႆ
ထႃႈၶိင်ႇထႃႈယၢမ်း – ဢဝ်ႁၢမ်းဢူပ်းပႅတ်
ထႃႈၵၢမ်ႇဢမ်ႇလႆႈၵိၼ် – တိၼ်မိုဝ်းၶိုင်ၸင်ႇသႆႉ
ထႃႈဝၼ်းပွႆးဢမ်ႇၵႃႈ – ထႃႈၽူၼ်ငိုၼ်ဢမ်ႇတူၵ်း
ထႃႈမိူဝ်ႈဢမ်ႇတၼ်း – ထႃႈဝၼ်းဢမ်ႇယဝ်ႉ
ထႃႈလိူၼ်ၶႅၼ်းႁၢမ်း – ထႃႈယၢမ်းၶႅၼ်းၵၢတ်ႈ
ထွမ်ႇၶၢဝ်ႇႁွမ်ႁူၺ်းႁူၺ်း – ၵႂႃႇတူၺ်းမဵၼ်သိုင်ႈသိုင်ႈ
ထွမ်ႇၶၢဝ်ႇလႅပ်ႈတေထူး – ၽိူဝ်ႇၵႂႃႇၸူးဢမ်ႇငႂ်ႈ
ထွမ်ႇပိူၼ်ႈၶႆႈ – ဢမ်ႇတၢၼ်ႇလႆႈတူဝ်ထူပ်း
ထွမ်ႇၵႂၢမ်းပေႃႈၸင်ႇငႄႈ – ၸူးၵႂၢမ်းမႄႈၸင်ႇယဵၼ်ႇ
ထွမ်ႇပိူၼ်ႈလၢတ်ႈဢမ်ႇယၢပ်ႇ – တၢပ်ႇတႄႉသမ်ႉဢမ်ႇပဵၼ်
ထွမ်ႇၵႂၢမ်းမိူင်းၸႂ်လု – ထွမ်ႇၵႂၢမ်းၸုၸႂ်လီ
ထွမ်ႇၶၼ်ၶူဝ်းၸႂ်သဝ်ႈ – ထွမ်ႇၶၼ်ၶဝ်ႈၸႂ်သႅဝ်း
ထွမ်ႇလိၵ်ႈထမ်းၸႂ်ဢူၼ်ႈ – ထွမ်ႇၵႂၢမ်းႁူၼ်ႈၸႂ်ဝိုၼ်း
ထွမ်ႇပိူၼ်ႈလၢတ်ႈႁၢင်ႈငၢႆႈ – ဢၢႆႈႁႃးတၢပ်ႇဢမ်ႇမေႃ
ထွမ်ႇပိူၼ်ႈဝႃႈလိူင်ႇၼႃႇ – ၵႂႃႇႁႃသမ်ႉဢမ်ႇႁၼ်
ထွမ်ႇပိူၼ်ႈဝႃႈၸမ်ၼႃႇ – ၵႂႃႇၵႂႃႇႁိူဝ်ႇပေႃးယမ်း
ထွမ်ႇၶၢဝ်ႇလႅပ်ႈပဵၼ်ႁဝ်း – ၵဝ်းတူၺ်းသမ်ႉပဵၼ်ပိူၼ်ႈ
ထွမ်ႇပိူၼ်ႈဝႃႈၶႅမ်ႉၼႃႇ – ၵႂႃႇတူၺ်းလၢႆးၶုၵ်းလုၵ်း
ထွမ်ႇၶၢဝ်ႇလႅပ်ႈၸႂ်တူဝ်း – ၸူးၵၼ်မင်ၸင်ႇႁူႉ
ထဝ်ႈယဝ်ႉၸင်ႇသွၼ်ထမ်း – သွၼ်ဢဝ်ႁိူဝ်ႇပေႃးယမ်းဢမ်ႇလႆႈ
ထဝ်ႈဢမ်ႇႁူႉၵႂၢမ်းထမ်း – ၵမ်းၵမ်းၶႆႈၶိူဝ်းပိူၼ်ႈ
ထဝ်ႈဢမ်ႇႁူႉလွင်ႈ – ပိူၼ်ႈယွင်ႈၵေႃႈၸူမ်းဢိုၵ်းဢိုၵ်း
ထဝ်ႈဢမ်ႇႁူႉတူဝ် – သဵင်ၶူဝ်ပၼ်းၸင်ႇၸင်ႇ
ထဝ်ႈဢမ်ႇႁၼ်ြတႃး – လၢတ်ႈမႃးမိူၼ်လုၵ်ႈဢွၼ်ႇ
ထဝ်ႈဢမ်ႇႁူႉၶၼ်ႇထႃႇ – ဢုပ်ႇၵႂႃႇမၼ်းလၼ်
ထဝ်ႈပေႃးဢွၵ်ႇႁဵပ်းသႃ – ယင်းပႆႇႁႃလွင်ႈမျၢတ်ႈ
ထဝ်ႈပေႃးသၼ်ႇလွႆႇလွႆႇ – ယင်းပႆႇပွႆႇၵၢၼ်လိူင်း
ထဝ်ႈႁူဝ်ႁွၵ်ႇပေႃးၶၢဝ် – လၢတ်ႈၶိူဝ်းသၢဝ်ဢမ်ႇလႅပ်ႈ
ထဝ်ႈဢမ်ႇႁူႉပရမၢတ်ႈ -ယေႈလၢတ်ႈယေႈၶႅၼ်းၽိတ်း
ထဝ်ႈၸႂ်ၶႅင်မၢၼ်ႇယႂ်ႇ – သႂ်ႇသႂ်ႇဢမ်ႇမႅၼ်ႈၽႂ်
ထဝ်ႈမၢၼ်ႇယႂ်ႇၸႂ်ၶႅင် – ထဵင်တႃလႅင်တႃမီႇ
ထဝ်ႈၵူၵ်ႇငူၵ်ႇၵုၵ်းငုၵ်း – ၵွႆးၶုၵ်းၶူၼ်ႉမိူဝ်ႈၼုမ်ႇ
ထဝ်ႈၵွၵ်းငွၵ်းၵွင်ႇငွင်ႇ – လၢတ်ႈဢမ်ႇပွင်ႇၵႂၢမ်းထမ်း
ထဝ်ႈယဝ်ႉၸင်ႇလၵ်း – ၶႃႁၵ်းၸင်ႇၵႆႉ
ထဝ်ႈမေႃယူႇမေႃၵိၼ် – ထဝ်ႈမီးသိၼ်မီးၵုင်ႇ
ထဝ်ႈပွင်ႇထဝ်ႈလႅင်း – ပိူၼ်ႈႁၵ်ႉပႅင်းၵူႈၵေႃႉ
ထဝ်ႈမေႃယိူၼ်ႉမေႃထိင်း – ထဝ်ႈၸၢႆးယိင်းဢမ်ႇယၢႆႈ
ထဝ်ႈမေႃသင်ႇမေႃသွၼ် – ၵူၼ်းမိူင်းဢွၼ်ၵၼ်ႁၵ်ႉ
ထဝ်ႈလၢတ်ႈၵႂၢမ်းတြႃး – ၽႂ်ၵေႃႈမႃးၸူမ်းလူႇ
ထဝ်ႈဢမ်ႇပွင်ႉၼႄးၽႂ် – ပိူၼ်ႈမႅၼ်ႈၸႂ်ၵူႈၵေႃႉ
ထုၵ်ႇဢဝ်ယႃႇၼႅတ်ႈ – ထုၵ်ႇပႅတ်ႈဝူၼ်ႉၵွၼ်ႇ
ထုၵ်ႇၸႂ်မီ – ဢမ်ႇလီၸႂ်ၽိုင်ႈ
ထုၵ်ႇၸႂ်ယႃႇၼႅတ်ႈၸူမ်း – မႅၼ်ႈလူမ်းယႃႇၼႅတ်ႈယုမ်ႉ
ထုၵ်ႇၼီႈပိူၼ်ႈဢွၼ်တၢင်း – သၢင်းလၢင်းပၼ်ၸင်ႇပေႇ
ထုၵ်ႇၸႂ်ပႃႈ – ယႃႇႁႂ်ႈၼႃႇၸႂ်လုင်း
ထုၵ်ႇၼီႈၸဝ်ႈၾႃႉ – ယႃႇႁႂ်ႈပဵၼ်ၼီႈၸဝ်ႈမုၼ်
ထုၵ်ႇလၢတ်ႈၸင်ႇလၢတ်ႈ – ပိူၼ်ႈမၢတ်ႈပဵၼ်ၵူၼ်းလီ
ထုၵ်ႇထၢတ်ႈၸႂ် – မႂ်ႁႅင်းတူဝ်
ထုၵ်ႇႁူပ်ႉၵေႃႈတေႁၼ် – ထုၵ်ႇပၼ်ၵေႃႈတေလႆႈ
ထုၵ်ႇၵိၼ်လႄႈထုၵ်ႇယေႃႇ – ဝၢႆးၼႆႉတေပေႃႇမႃး
ထုၵ်ႇမၢၵ်ႈဢမ်ႇယၢၵ်ႈၸႂ် – ၽႂ်ၽႂ်ၵေႃႈမႃးမႅင်ႇ
ထုၵ်ႇမီးဢမ်ႇပေႃးၶိုၵ်ႉ – မိုၵ်ႉတႅမ်ႈၸေႈပဵၼ်ငိုၼ်း
ထုၵ်ႇလႆႈၵိၼ်မႃးၵူၺ်း – ထုၵ်ႇလႆႈတူၺ်းႁူပ်ႉသႂ်ႇ
ထုၵ်ႇတေလႆႈၵိၼ် – ပၢႆတိၼ်ဢမ်ႇၼုၵ်းၵူမ်ႇ
ထုၵ်းထိၵ်းၵၼ်ပဵၼ်သျွတ်ႉ – ပွတ်ႉပႅတ်ႉၵၼ်ပဵၼ်ၾႆး
ထီႇၸင်ႇၼႃ – ႁႃၸင်ႇမီး
ထူမ်ႇၼမ်ႇလၢႆးၶိုၼ်ႈၾႃႉ – တူၵ်းပႃႉၶိုၼ်တူဝ်ၵဝ်ႇ
ထၢမ်လီထၢမ်ပႃႈၼႃႈ – ၶႃႈၸိုဝ်ႈၶႃႈဝၢႆးလင်
ထၢမ်ၸိုဝ်ႈၵၼ်တွင်းဝႆႉ – ၵႆႉႁွင်ႉၸဵဝ်းမိုတ်ႈၵၼ်
ထၢင်ႇဢွၼ်ႇၸၢင်ႈၶႄးႁူင် – ထၢင်ႇလူင်ၸၢင်ႈၶႄးႁၢမ်း
ထၢင်ႇလူင်ၸၢင်ႈၽိတ်း – ထၢင်ႇဢိတ်းဢိတ်းသမ်ႉဢွင်ႇ
ထၢင်ႇႁၢႆႉထိူမ်ႁႅင်း – ဢဝ်တၢင်းပႅင်းလု
ထၢင်ႇလဵၼ်ႈပဵၼ်တႄႉ – လႄႉမႃးၸူးႁဝ်း
ထၢင်ႇႁၢႆႉၶႅၼ်းပဵၼ် – ထူပ်းၶဵၼ်ၼႃႈမႆႈ
ထိုင်ယၢမ်းၸင်ႇလၢတ်ႈ – လွင်ႈၵၢတ်ႈဢမ်ႇမီး
ထိုင်ၶိင်ႇၸင်ႇၶပ်း – မႅၼ်ႈၸပ်းဢမ်ႇပိူင်ႈ
ထိုင်တူဝ်ၸင်ႇႁူႉ – မၢၵ်ႇမူႉၵႄႈႁိပ်ႇ
ထိုင်ပွႆးၸင်ႇၵႃႈ – ပႂ်ႉထႃႈၵူၼ်းၵိုၼ်း
ထိုင်တီႈၸင်ႇဝၢင်း – မိူဝ်ႈၵၢင်တၢင်းယႃႇပွႆႇ
ထိုင်ၶိင်ႇၸင်ႇၵွႆႈႁဵတ်း – ပႃတွတ်ႇမဵတ်းၸင်ႇတိုတ်ႉ
ထႅင်ႈၵေႃႉၼိုင်ႈႁၼ်လၢႆ – ႁၢႆၵေႃႉၼိုင်ႈႁၼ်ဢေႇ
ထဵင်ၼူၵ်ႇၶတ်းႁၢႆႉ – ပိူၼ်ႈၶၢႆႉပၢင်ပေႃးဝၢႆး
ထိူၵ်ႈသင်ဢဝ်ၼၼ်ႉ – ယႃၵၼ်ႉၼႅင်ၸွမ်း
ထၢင်ႇယူဝ်းၶႅၼ်းႁၢႆႉ – ၸၢင်ႈၶၢႆႉၽႃႈၵွပ်းၸူး
ထၢင်ႇလီသမ်ႉၸႃႉ – ထၢင်ႇၵျႃႉၶႅၼ်းၽိတ်း
တွၼ်ႈ (ထ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ၼ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ၼ)
ၼႃႈတူႇလီၵူဝ် – ၼႃႈၶူဝ်လီႁၵ်ႉ
ၼႃႈယုမ်ႉလီႁၵ်ႉ – ၼႃႈၸၵ်ႉလီၸင်း
ၼႃႈဢွၵ်ႇထုၵ်ႇ – လုၵ်ႇသၢင်ႇတေႃႇ
ၼႃႈႁိူၼ်းသႃႇ – ႁႃငိုၼ်းငၢႆႈ
ၼႃႈႁိူၼ်ႈယၢႆႈ – ႁႃငိုၼ်းယၢပ်ႇ
ၼႃႈႁိူၼ်းယုင်ႈ ၵၢမ်ႇလူင်း
ၼႃႈႁိူၼ်းပူင်း ၽၢၼ်ႁၢႆႉ
ၼႃႈလႅၼ်ႇႁၢင်မွၵ်ႇ – ၸွမ်းၽွၵ်ႇၶိူဝ်းၶိူဝ်း
ၼႃႈသူမ်ႈၸႂ်လီ – ၼႃႈၶီၸႂ်ယၢဝ်း
ၼႃႈႁၢႆႉတႃလိူၵ်ႇ – ၸႂ်မိူၵ်ႈသုတ်းပၵ်း
လၢတ်ႈယုမ်ႉလီတူၺ်း – လၢတ်ႈငၢႆႈဢူၺ်းၵေႃႉလိူင်ႇ
ၼႃးလၢႆမၢၼ်ႈပႃႇၽုၼ်ႇ – ႁိူၼ်ႁူဝ်တွပ်ႈၸင်ႇသုၼ်ႇ
ၼႃးၼမ်ႉၾႃႉ – တွင်းတႃႉၵိူဝ်းလီၾူၼ်
ၼမ်ႉသႂ်တီႈလႂ် – ၸႂ်လီတီႈၼၼ်ႈ
ၼမ်ႉႁၢႆႉယႃႇၼႄးႁိူဝ်း – သိူဝ်ႁၢႆႉယႃႇၼႄးၵၢမ်ႇ
ၼမ်ႉသႃႇတႃႈလီ – ၵူၼ်းမီးငိုၼ်းၵေႃႈလိူင်ႇ
ၼမ်ႇယူႇၵႆ – ၾႆးယူႇၵႂ်ႈ
ၼမ်ႉၵိုင်ႇတူဝ် – ၽူဝ်ၵိုင်ႇမေး
ၼမ်ႉယႂ်ႇၵေႃႈ ႁိူဝ်းသုင်
ၼမ်ႉဝၢၼ်ၵမ်ႈၵူၼ်းတၵ်း – ၽၵ်းဝၢၼ်ၵမ်ႈၵူၼ်းႁုင်
ၼမ်ႉသူမ်ႈမၢၵ်ႇၶူႈလင် – ပဵၼ်သင်ၸင်ႇၵွႆးႁူႉ
ၼမ်ႉဢမ်ႇလူၼ်ႉတီႈသုင် – တၢင်းဢမ်ႇဢုင်တီႈၵႅၼ်ႇ
ၼမ်ႉသၢမ်သူပ်းဢိုတ်းလႆႈ – ၵူၼ်းသၢမ်သူပ်းၶႆႈၸွတ်ႇဝဵင်း
ၼႅတ်ႈၵႃႉ ၼႅတ်ႈၶၢႆ – ၽႂ်တၢႆပေႃးဢမ်ႇတၼ်းႁူႉ
ၼႅတ်ႈၵႂႃႇ ၼႅတ်ႈမႃး – ၽြႃးပေႃႈဢမ်ႇတၼ်းဝႆႈ
ၼႅတ်ႈႁဵတ်းၼႅတ်ႈသၢင်ႈ – တႂ်ႈလၢင်ႈဢမ်ႇတၼ်းပတ်း
ၼႅတ်ႈၶိုၼ်ႈၼႅတ်ႈလူင်း – ႁူဝ်ပေႃးပူင်းပူင်ႈယူင်ႈ
ၼႅတ်ႈၵႂႃႇၼႅတ်ႈၽၢႆႈ – တၢၼ်ႇပိူၼ်ႈပၢႆႈမီသိူဝ်
ၼႅတ်ႈလုၵ်ႈၼႅတ်ႈယၢင်ႈ – ၽူင်ႈၽၢင်ႈယဵပ်ႇႁၢင်မႅဝ်း
ၼႅတ်ႈၵႂႃႇၼႅတ်ႈၶိုၼ်း – ယဵပ်ႇႁၢင်ၽိုၼ်ႈ ၶွင်ႈတင်ႇ
ၼႅတ်ႈဝႆႉတင်းပီ – ဝၼ်းလီဢမ်ႇတၼ်းတူၺ်း
ၼႅတ်ႈမၢင်ႉတင်းၸူဝ်ႈ – ႁိူၼ်းႁူဝ်ႈဢမ်ႇတၼ်းမႄး
ၼႅတ်ႈဝႆႉၵူႈမိူဝ်ႈ – ၶေႃးသိူဝ်ႈပေႃးတၢၼ်ႇၶႅပ်းၶႆ
ၼႅတ်ႈလၢတ်ႈၼႅတ်ႈၸႃ – တႃပေႃးဢမ်ႇတၼ်းၽႅပ်ႉ
ၼႅတ်ႈႁွမ်ငိုၼ်းႁွမ်ၶဝ်ႈ – ထၢင်ႇတၢင်းထဝ်ႈမီးၵႆ
ၼႅတ်ႁွမ်ၶဝ်ႈႁွမ်ငိုၼ်း – တိုၼ်းဢၢၼ်းၵိုၵ်းၵမ်ႇၽႃႇ
ၼႅတ်ႈၵိၼ်ၽၵ်းၵိၼ်ၶဝ်ႈ – ထၢင်ႇဢမ်ႇထဝ်ႈသမ်ႉယၢၼ်း
ၼႅတ်ႈၵိၼ်ၶဝ်ႈၵိၼ်ၽၵ်း – ထၢင်ႇတေလၵ်းသမ်ႉငိူဝ်ႈ
ၼႅတ်ႈၵိၼ်ၼႅတ်ႈၽဵဝ်ႈ – ၶဵဝ်ႈပေႃးမၢင်ႈပဵၼ်တႅဝ်း
ၼႅတ်ႈဢိုၼ်ၸၢင်ႈၶမ်ၶေႃး – ၵိၼ်လေႃးၽႃႉသႆႈတႅၵ်ႇ
ၼႅတ်ႈၵိၼ်ဢမ်ႇဝၢၼ် – ၼႅတ်ႈသၢၼ်ဢမ်ႇၶိုၼ်ႈ
ၼႅတ်ႈႁဵတ်းလူႉငၢႆႈ – ၼႅတ်ႈပၢႆႈၶူဝ်းသုမ်း
ၼၢင်းယိင်းယူႇလူၺ်းႁၢၼ်ႇ – ၽူႈၸၢႆးယူႇလူၺ်ႈၺၢၼ်ႇ
ၼၢင်းယိင်းမေႃလၢတ်ႈ – မႅၼ်ႈထၢတ်ႈၸႂ်လီ
ၼၢင်းယိင်းၵိူဝ်းလီၽူဝ် – တူဝ်သတ်းၵိူဝ်းလီၸဝ်ႈ
ၼင်ႈဢမ်ႇထုၵ်ႇလုၵ်ႉသေ
ၼင်ႈၵေႃႈဢမ်ႇထုၵ်ႇ – လုၵ်ႉၵႂႃႇပႆႇလီ
ၼွၼ်းၸဝ်ႉလႆႈၼွၼ်းၼမ် – လုၵ်ႉၸဝ်ႉလႃႈၶီႈၸမ်
ၼွၼ်းထႃႈၵၢမ်ႇၸင်ႇတုၵ်ႉ – ယူႇသုၵ်ႉသၵ်ႉၸင်ႇမဵၼ်
ၼွၼ်းဢမ်ႇလပ်း – ၸႂ်ၸပ်းတၢင်းၼွၵ်ႈ
ၼွၼ်းဢမ်ႇလႆႈ – ၸႂ်မႆႈတၢင်းၼႂ်း
ၼွၼ်းဢမ်ႇပျေႃႇ – ၸၢင်ႈပေႃႇလွင်ႈသေမဵဝ်း
ၼွၼ်းလိုၵ်ႈပႄႉပူႉယႃႈ – လုၵ်ႉလႃႈပႄႉၽိုၼ်းၾႆး
ၼွၼ်းပႂ်ႉၵၢမ်ႇၸင်ႇၽၢၼ် – ၶၢၼ်ႉႁဵတ်းၵၢၼ်ၸင်ႇၵွတ်း
ၼွၼ်းပႂ်ႉမိူဝ်ႈ – ငိူဝ်ႈပႂ်ႉဝၼ်း
ၼွၼ်းပႂ်ႉၵၢမ်ႇ – လၢမ်းပႂ်ႉသုၼ်ႇ
ၼွင်ႉဝႃႈလီ – ပီႈဝႃႈၸႃႉ
ၼွင်ႉဝႃႈၽႃႉ – ပီႈဝႃႈလႅဝ်း
ၼွင်ႉပႄႉပီႈႁိူၼ်းၼၼ်း – ပီႈပႄႉၼွင်ႉဢမ်ႇပၼ်ႁႆႈ
ၼႂ်းၼမ်ႉမီးပႃ – ၼႂ်းၼႃးမီးၶဝ်ႈ
ၼႂ်းႁိူၼ်းမီးၽူႈလၵ်ႉ – ယေႈတၵ်ႉယေႈၶူဝ်းႁၢႆ
ၼၢႆးလူင်းၸင်ႇတၢၵ်ႇၽႃႈ – သမ်ႉဝႃႈၶႂ်ႈၼွၼ်းဢုၼ်ႇ
ၼူၵ်ႉၸွၵ်ႇပႄႉလႅမ်ႈၶႃး – ၸၢင်ႉငႃးပႄႉတုမ်မႆႉ
ၼူၵ်ႉသႆႈဢိတ်းလူၸၢင်ႉ – ၼႅတ်ႈမၢင်ႉယၢပ်ႇလၢႆလၢႆ
ၼူၵ်ႉၵဵဝ်ႇၸပ်းလင်ဝူဝ်း – ထၢင်ႇတူဝ်မၼ်းၼၵ်းၼႃႇ
ၼူၵ်ႉသီႇပိတ်ႈယွပ်ႇယေယေ – ထၢင်ႇလိၼ်တေယၢၼ်းၵွပ်ႈ
ၼူၵ်ႉၽႂ်ဝႃႈမၼ်းႁွင်ႉ – ၵွင်ႉၽႂ်ဝႃႈမၼ်းယမ်
ၼူၵ်ႉယုင်းၵႃႈ – ၼူၵ်ႉၸွၵ်ႇဝႃႈဢမ်ႇႁၢင်ႈလီပဵင်းမၼ်း
ၼုင်ႈလီပိူၼ်ႈဝႃႈသမ်ႇ – ၵိၼ်လီၽႂ်ဢမ်ႇႁၼ်
ၼုင်ႈၼမ်ဢမ်ႇမႆႈ – ၶႆးၼမ်ဢမ်ႇၶူမ်း
ၼၵ်းတီးမႃႇၵေႃႈ – ဢမ်ႇသႃႇတီႈၸႂ်
တွၼ်ႈ (ၼ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ပ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ပ)
ပၺႃႇၼမ် – ၶဝ်ႈထမ်ဢမ်ႇလႆႈ
ပႃၼဝ်ႈတူဝ်ၼိုင်ႈ – ၼဝ်ႈတင်းသႃႉ
ပႃၶူဝ်ႈၵွၼ်ႈမႃးဝၢင်း – ၸၢင်ႈၶႄးလၼ်ဢွၵ်ႇပၢႆႈ
ပႃဢမ်ႇၵဵတ်း – ႁဵပ်းဢမ်ႇႁွၼ်
ပႃဢမ်ႇမီးႁူ – ပူဢမ်ႇမီးပိၵ်ႇ
ပႃဢမ်ႇမီးၶဵတ်ႇၵႃႈ – ယႃႈဢမ်ႇမီးသႃးၸေးပေႃး
ပႃၶီးၸူမ်းၼမ်ႉမႆႇ —-
ပႃၶီးလၢႆးပွမ်တဝ်း – မႄႈႁိူၼ်းလဝ်းပွမ်သၢဝ်
ပႃပႆႇတွတ်ႇ – ယႃႇၼႅတ်ႈထွတ်ႇၵၼ်းမဵတ်း
ပႃႇၶႃးလႅင်မီးသိူဝ်ၾႆး —-
ပၢႆလိူဝ်မီး – သမ်ႉပီးထႅင်ႈ
ပၢႆလိူဝ်ၵပ်ႉ – သမ်ႉမႃးလပ်ႉၼႃႈၵုၼ်ႇ
ပၢႆလိူဝ်ၶၢၼ်ႉသမ်ႉငဝ် – ပၢႆလိူဝ်မဝ်သမ်ႉလႅတ်း
ပၢႆလိူဝ်ၼူၵ်ႇသမ်ႉတိုဝ် – ပိူၼ်ႈဝႃႈႁိုဝ်ဢမ်ႇပွင်ႇ
ပၢႆလိူဝ်ၽၢၼ်သမ်ႉၶၢၼ်ႉ – ပၢႆလိူဝ်သၢၼ်ႉသမ်ႉၵွတ်း
ပၢႆလိူဝ်မီးငိုၼ်း – ႁဵတ်းသင်ၵေႃႈတိုၼ်းသုၼ်ႇ
ပၢႆလိူဝ်သမ်ႉဢုပ်ႇ – သမ်ႉတဵၵ်းလႆႈၽၢၼ်း
ပၢႆလိူဝ်ၸၢင်ႈၵၢၼ်း – သမ်ႉၺႃးသၢဝ်ၼွၼ်းၼူၵ်ႇ
ပၢႆလိူဝ်ပိူၼ်ႈတူၵ်းၸၢၼ်း – သမ်ႉဢဝ်ၵၢၼ်းၸွမ်းပုင်ႈ
ပၢႆမႃႉမႃႉလၢႆး – ပၢႆၵႂၢႆးၵႂၢႆးၽိူၵ်ႇ
ပႆပႆၵႂႃႇၵႂႃႇ – ၽႃႇတိၼ်ပေႃးယွၵ်း
ပႆတၢင်းၵူတ်ႉဢမ်ႇတၢႆ – ပႆတၢင်းသိုဝ်ႈဢၢႆပိူၼ်ႈ
ပႆႇႁၼ်ယႃႇၼႅတ်ႈဝႃႈ – ၵႃႈငိၼ်းယႃႇၼႅတ်ႈယုမ်ႇ
ပႆႇယၢမ်ႈႁူႉလၢမ်းၶိုင် – ၼိုင်ၵမ်းလႂ်ၽိတ်းၵမ်းၼၼ်ႉ
ပႆႇလၢတ်ႈပေႃးႁူႉ – ပႆႇလူႉပေႃးႁၼ်
ပႆႇမေႃၶႂ်ႈၸုၼ်ႉၵၢမ်ႇ – တႃႉၶၢမ်ႇႁဵတ်းၶႃႈပိူၼ်ႈ
တွၼ်ႈ (ပ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ၽ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ၽ)
ၽ ၽၼ်းၼႆႉ ဢမ်ႇႁၼ်ႁွႆး
ၽ ၽၢႆၼႂ်းသွင်း – မွင်းလင်ၼႂ်းၵူၺ်
ၽ ပိူၼ်ႈသပ်းမႃး – မိုဝ်းႁႃးသႄႇသႂ်ႇ
ၽ ႁူၼ်ႈၽူၼ်လူင်း – ၵိူတ်းသူင်းထုၵ်ႇၵူၼ်းၶၢၼ်ႉ
ၽ လႅတ်ႇၽူၼ်ႁွင် – သဵင်ၵွင်ႁူၼ်ႈဢိုတ်ႇ
ၽ ဢမ်ႇၽၢႆ – ၸၢႆးဢမ်ႇလပ်ႉ
ၽ လႅတ်ႇၸဵဝ်းယၢမ်ႈ – ၽ ၵၢမ်ႈၸဵဝ်းၵႅၼ်ႇ
ၽႃႇမႆႉဢမ်ႇဝႄႈတႃ – တြႃးဢမ်ႇဝႄႈၼႃႈ
ၽႃႇမႆႉၽႃႇတၢင်းပၢႆ – ၽႃႇဝၢႆၽႃႇတၢင်းငဝ်ႈ
ၽႃႇမိုဝ်းၼႃ – သၼ်ၶႃၶိူင်ႇ
ၽႃႈႁွမ်ႈပွတ်းသေတူဝ် – ႁူမ်ႈႁူဝ်လုတ်ႈတိၼ်ပႅတ်ႈ
ၽူႈလၵ်ႉဢမ်ႇႁူႉၶၼ်ၵႂၢႆး
ၽူႈလၵ်ႉမီးတႂ်ႈလၢင်ႈ – ၸၢင်ႈၵႃႉၵေႃႈႁွၼ်ႇထူး
ၽူႈသၢဝ်ၼွင်း – ၵျွင်းၸၢင်ႈၵၢၼ်ႉ
ၽူႈသၢဝ်ႁၢႆ – ပၢႆပႃးၶိူင်ႈၶိူဝ်းႁွႆ
ၾႆးတင်းၼွၵ်ႈ – ယႃႇသွၵ်ႈမႃးၸုတ်ႇၼႂ်းႁိူၼ်း
ၾႆးႁိူၼ်းတႂ်ႈ – ယႃႇႁႂ်ႈမႆႈႁိူၼ်းၼိူဝ်
ၽႂ်ၼႄးၽႂ်ၵေႃႈယႃႇ – တႃႇလီၵၼ်ဢမ်ႇၸႂ်ႈ
ၽႂ်ႁူႉၵေႃႈမၼ်းယၢပ်ႇ – ၽႂ်ႁၢပ်ႇၵေႃႈမၼ်းၼၵ်း
ၽႂ်ႁႃမၼ်းလႆႈ – ၽႂ်ၶႆႈမၼ်းၶိုတ်း
ၽႂ်မီးငိုၼ်းပဵၼ်ၶဝ်ႈ – ၽႂ်မီးၶဝ်ႈပဵၼ်ၶုၼ်
ၽႂ်တူၵ်းလိုၼ်း – တိုၼ်းႁၢမ်းပဝ်ႇ
ၽႂ်ယႂ်ႇမၼ်းပဵၼ်လုင်း – ၽႂ်သုင်မၼ်းပဵၼ်ပီႈ
ၽႂ်လႅတ်းမၼ်းဢဝ် – ၽႂ်ငဝ်မၼ်းႁၢမ်း
ၽႂ်ႁႃၵတ်ႉမၼ်းတၢပ်ႇ – ၽႂ်ယၢပ်ႇလႆႈမၼ်းၵိၼ်
ၽႂ်ၵိၼ်ထုၼ် – တွင်ႉမၼ်းၶူၼ်ႉ
ၽၼ်လီၵေႃႈယႃႇထၢင်ႇ – ထၢမ်ႇပေႇတၢင်ႇၶႅၼ်းၽိတ်း
ၽၢၼ်ထူၼ်ႈၸင်ႇႁူႉတူဝ် – ၶူဝ်းယွၵ်းၸင်ႇႁႃၵၢတ်ႇ
ၽၢၼ်ဢမ်ႇၶီ – မီးဢမ်ႇၸူမ်း
ၽၢၼ်ယဝ်ႉၶိုၼ်းမီး – ၽၵ်းၵီးဢမ်ႇၶႂ်ႈၽုၵ်ႇ
ၽၼ်းႁိူဝ်းဝႆႉလၢႆတႃႈ – မႃႇၶဝ်းဝႆႉလၢႆမိူင်း
ၽၼ်းတွင်ယႃႇႁႂ်ႈထိုင်မႃႇ – လႃႇပိူၼ်ႈယႃႇႁႂ်ႈယႃႇႁႂ်ႈထိုင်ၸိူဝ်ႉထိုင်ၶိူဝ်း
ၽူၼ်တူၵ်းမႃး – ပႃးၼမ်ႉၵဝ်ႇၼီ
ၽူၼ်တူၵ်းၸဝ်ႉပႃးၼမ်ႉတဝ်ႈ – လႅတ်ႈဢွၵ်ႇၸဝ်ႉပႃးတူၺ်
ၽူၼ်ငိုၼ်းၽူၼ်ၶမ်းဢမ်ႇသွၼ်ႇႁႃႇ – ၾႃႉၾႃႇဢမ်ႇသွၼ်ႉႁွႆး
ၽိတ်းယဝ်ႉၸင်ႇႁူႉ – လူႉယဝ်ႉၸင်ႇႁၼ်
ၽိတ်းၸင်ႇၸၢင်ႈႁူႉ – လူႉၸင်ႇၸၢင်ႈမႄး
ၽိုၵ်းလွင်ႈလီပဵၼ်ယၢပ်ႇ – တၢပ်ႇလွင်ႈႁၢႆႉၸဵဝ်းမေႃ
ၽိူဝ်ႉႁဝ်းႁူႉ – ပိူၼ်ႈပေႃးႁူႇ
ၽိူဝ်ႇတႃႉမီးပႃႈၼႃႈ – ၵတ်ႉၵႃႈယူႇတၢင်းလင်
တွၼ်ႈ (ၽ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (မ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(မ)
မ တႂ်ႈလၢင်ႈဢွၼ်ႁူဝ် – ဝူဝ်းတႂ်ႈထုၼ်ဢွၼ်ၶီႈ
မ လႅၵ်ႈၵႂၢႆး – ဝၢႆးတေႃႇၸူဝ်ႈ
မ ပိတ်ႉဢမ်ႇလိုမ်းတိၼ် – ၵူၼ်းသွင်တိၼ်ဢမ်ႇလိုမ်းဢၵျၢင်ႉၵဝ်ႇ
မီးတႃႁႂ်ႈမေႃလူ – မီးႁူလူဝ်ႇမေႃထွမ်ႇ
မီးသူပ်းလူဝ်ႇမေႃလၢတ်ႈ – ယႃႇမၢတ်ႈပိူၼ်ႈမဝ်မၢင်
မီးငိုၼ်းဢမ်ႇၶၢၼ်ႉ – မီးၵၢၼ်ဢမ်ႇၵူၼ်ႉ
မီးငိုၼ်းၸႂ်ၼုမ်ႇ – မီးၶဝ်ႈၸႂ်လူၼ်း
မီးမိူဝ်ႈလႂ်ၸင်ႇပၼ် – ပေႃးႁၼ်ယႃႇပေယွၼ်း
မူတိူၵ်ႈၽႃ – မႃတိူၵ်ႈႁူဝ်ႉ
မူႁဝ်ႈပၼ်ႇႁႃတေႃ – မေႃလၢႆးပၼ်ႇႁႃၽၢႆႇ
မေႃဢုပ်ႇသိုဝ်ႉလႆႈပေႃး – မေႃယေႃးၶၢႆလႆႈၵႃႈ
မေႃၵႃႉမေႃၶၢႆ – လၢႆပီဢမ်ႇယၢၵ်ႈ
မေႃဢုပ်ႇမေႃၶႆႈ – လႆႈၵေႃႉသေႈၼမ်
မေးပိူၼ်ႈယႃႇၵဝ်း – မေးႁဝ်းၸင်ႇဢမ်ႇႁၢႆႉ
မႄႈၼူၵ်ႉၸွၵ်ႇ – ဢမ်ႇဢွၵ်ႇၶႆႈၼူၵ်ႉတူႈ
မေႃလိၵ်ႈၸင်ႇၵေႃႉၸၢႆး – မေႃလၢႆၸင်ႇၵႃႈယႂ်ႇ
မေႃႈဢွၼ်ႇပူင် – မေႃႈလူင်တင်ႈ
မိူဝ်ႈလိၼ်ႈၸၢင်ႈမႅပ်ႈမႃး – ႁႃးလူဝ်ႇထိူဝ်ႁႂ်ႈလႆႈ
မိူဝ်ႈၽုၵ်ႈဢမ်ႇလူဝ်ႇထႃႈ – မိူဝ်းၼႃႈဢမ်ႇလူဝ်ႇမွင်း
မိူဝ်ႈမီးၸင်ႇၸၢင်ႈလႆႈ – ဝၢႆးၼႆႉဢေပတေ
မိူဝ်ႈပိူၼ်ႈၸၢင်ႈပၼ် – ယႃႇၶတ်းၶၼ်ၼိုၵ်းၼူၵ်ႇ
မိူဝ်ႈငို်ၼ်းၶဝ်ႈပိူၼ်ႈႁၼ် – ဝၼ်းငိုၼ်းဢွၵ်ႇၽႂ်ဢမ်ႇႁူႉ
မိူဝ်ႈတႄႇႁၢင်ႈတေႁူင် – ဝၢႆးမႃးၵူင်တူတ်ႇသူတ်ႇ
မိူဝ်ႈမႃးမႃးတင်းသိူဝ်း – မိူဝ်ႈမိူဝ်းမိူဝ်းတင်းၶီ
မိူဝ်ႈၵိူတ်ႈတၢၼ်ႇတေတၢႆ – ဝၢႆးမႃးသမ်ႉလိုမ်းပႅတ်ႈ
မိူဝ်ႈၼႆႉလႃႈယဝ်ႉ – သမ်ႉၸဝ်ႉမိူဝ်ႈၽုၵ်ႈ
မဵဝ်းတေၵျႃႉ – ဢမ်ႇလူဝ်ႇထႃႉတိုၼ်းမေႃ
မဵဝ်းဢမ်ႇၶေႃႈ – ပေႃႈမႄႈလၢတ်ႈၶႅၼ်းတိုဝ်
မဵဝ်းတေလုၼ်ႈ – ၶဵဝ်ႈငုၼ်ႈၸဵမ်မိူဝ်ႈလဵၵ်ႉ
မဵဝ်းတေလီ – ဢမ်ႇလူဝ်ႇၶီၸႂ်ၵွပ်ႈ
မဵဝ်းဢမ်ႇႁူင် – ဢွၼ်ၵၼ်သူင်လွင်ႈမိူၵ်ႈ
မိူင်းတႂ်ႈလႄႈမိူင်းၼိူဝ် – သႃႈမၢၵ်ႇၶိူဝ်ယင်းပိူင်ႈ
မိူင်းၽီၵမ်ႈတၢင်းလူႇ – တီႈယူႇၵမ်ႈႁူဝ်ၸႂ်
မႆႉလႅမ်ပိူၼ်ႈၸင်ႇပၵ်း – ၵူၼ်းလၵ်းပိူၼ်ႈၸင်ႇၸႂ်ႉ
မတ်းၵိၼ်ယဝ်ႉမတ်းၵႂႃႇ – ဝႆႉၵျၢမ်ႇမႃႇပၼ်မဵၼ်း
မိုၼ်းတႃၽႃႇတေႃ
မၢၵ်ႇႁဵဝ်ႇၵိၼ်ၼဵဝ် – မၢၵ်ႇၶဵဝ်ႁူင်ႈငၢႆႈ
မိူဝ်ႈၶၢၼ်ႇယႃႇၼွၼ်းဝၼ်း – ယၢမ်းတၼ်းယႃႇယူႇလၢႆ
မွၵ်ႇၵႄႇယဵၼ်ပဵၼ်ၽူၼ် – ၵူၼ်းလႄႇယဵၼ်းပဵၼ်ၸူၼ်
မၢၵ်ႈဢမ်ႇၼဝ်ႈၼွၼ်ဢမ်ႇၸီး – ၵႂၢမ်းဢမ်ႇမီးပိူၼ်ဢမ်ႇလၢတ်ႈ
မႅၼ်ႈယၢမ်းၸင်ႇလၢတ်ႈ – မႅၼ်ႈထၢတ်ႈၸင်ႇၵိၼ်
မုၼ်ၸဝ်ႈလူင်လွၼ်ႇ – ၸဝ်ႈသၢင်ႇဢွၼ်ႇၶႅၼ်းၵျၢမ်း
မၢၵ်ႇမူၼ်ႇ ဢမ်ႇပႆႇလူၼ်ႇၶႆး
မိုၼ်းတႃယႂ်ႇလိူဝ်တွင်ႉ
မိုဝ်းႁဝ်းဢမ်ႇယၢဝ်း – ယႃႇတၢဝ်းၵႆၵႆ
မႆႉလႅမ်ႈၼိုင်ႈဢမ်ႇပဵၼ်ၽၢႆ – ဝၢႆသိၵ်ႈၼို်င်ႈဢမ်ႇပဵၼ်ၶူတ်ႇ
မွၵ်ႈႁၢင်ႈလီ – မီးမိူဝ်ႈၸပ်းၼိူဝ်တူၼ်ႈ
မူၼ်ႈၵ ဢမ်ႇမူၼ်ႈၶၢႆ
တွၼ်ႈ (မ) သုတ်းတီႈၼႆႈယဝ်ႉၶႃႈ။
သိုပ်ႇတူၺ်းတွၼ်ႈ (ယ)သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ယ)
လႃႇၼမ်ႉတွင်ႈၸႂ်ပႃ – လႃႇမႃတွင်ႈၸႂ်ၸဝ်ႈ
လႃႈလီႈၸီႇၽဝ် – ဢဝ်ဢိဝ်လႆႈတၢင်းယၢပ်ႇ
လႃႈလီႈႁႃၸၢင်ႈၺႃး – လႃႈလီႈပႃးသၢင်ႇထုၵ်ႇ
လီပိူဝ်ႈၶဝ်ႈ – ယဝ်ႉပိူဝ်ႈငိုၼ်း
လီပိူဝ်ႈထၢမ် – ငၢမ်းပိူဝ်ႈတႅမ်ႈ
လီပိူဝ်ႈတႅမ်ႈ – ၶႅမ်ႉပိူဝ်ႈမၢႆ
လီတေႃႇလီ – ၵီးႁွမ်တေႃႇၼိူဝ်ႉသႃႈ
ၸႃႉတေႃႇၸႃႉ – မၢၵ်ႇၼႃႉၵပ်းၶဝ်ႈယဵၼ်
လုၵ်ႈလီပႃးပေႃႈမႄႈၶိုၼ်ႈၾႃႉ
လုၵ်ႈၸႃႉပႃးပေႃႈမႄႈၶိုၼ်ႈလုမ်း
လမ်ၼမ်ႁႂ်ႈၶိုင်သၢႆး – တူၵ်းငရၢႆႈႁႂ်ႈထိုင်ၵူၼ်ႈမေႃႈ
လၢမ်းလိမ်းလၢတ်ႈၵေႃႈမဝ် – လၢမ်းလိမ်းဢဝ်ၵေႃႈပိူင်ႈ
လႆႈၵိၼ်ယႃႇယၢမ်ႈ – ႁၢမ်းၵိၼ်ယႃႇလၢပ်ႇ
လၢမ်းလိမ်းသိုဝ်ႉဢမ်ႇလႆႈ – လႃႈလီႈဝႆႉၸၢင်ႈထူး
လုၵ်ႈဢွၼ်ႇလဵၼ်ႈၵၢင်ၵႅၼ်ႇ – ၵူၼ်းထဝ်ႈယႃႇဢႅၼ်ႇၸွမ်း
လူတူဝ်ၸင်ႇသၢၼ်သွင်း – တူၺ်းမွင်းၸင်ႇသၢၼ်ၵူၺ်
လုၵ်ႈတူၵ်းၽၢၵ်ႇ –မႄႈတၢၵ်ႇတၢႆ
လုၵ်ႈႁၵ်ႉပဵၼ်လုၵ်ႈၸင်း – ၶမ်းလႅင်ပဵၼ်ထူဝ်ႇၼဝ်ႈ
လုၵ်ႈမူင်ႈၵေႃႈမူင်ႈပႅင်း – လုၵ်ႈမႅင်းၵေႃႈမႅင်းႁၵ်ႉ
လုၵ်ႈလၢင်းႁူႉၶေႃႈ – ၵွပ်ႈပေႃႈမႄႈသင်ႇသွၼ်
လိူၼ်သိပ်ႈယႃႇၵႃႉၶဝ်ႈ – လိူၼ်ၵဝ်ႈယႃႇၵႃႉၵိူဝ်
လိူၼ်သၢမ်ၶႅၵ်ႇယႃႇတဝ်ႈ – လိူၼ်ၵဝ်ႈၶႅၵ်ႇယႃႇမႃ
လိူၼ်သၢမ်ၵွတ်းၽႃႈ – လိူၼ်ႁႃႈၵွတ်းၽၵ်း
လိူၼ်တေလႅင်း – တူၼ်ႈမၢၵ်ႇၵႅင်းမႃးလပ်ႉ
လိူၼ်ဢမ်ႇပႂ်ႉၵၼ် – ဝၼ်းဢမ်ႇပႂ်ႉၵၢတ်ႇ
လၢတ်ႈယွႆႈၵူၼ်းမဝ် – ၵဝ်းယွႆႈၵူၼ်းလုၼ်ႈ
လၢတ်ႈၸႃႉႁႂ်ႈလီမႃး – ထဵင်ၸႃးႁႂ်ႈငိူၼ်ႈပေႃႇ
လၢတ်ႈၵတ်ႉၶတ်းၵျၢင်ႇ – ထၢင်ႇပိူၼ်ႈဢမ်ႇႁူႉသင်
လၢတ်ႈႁတ်းၵႂႃႇႁတ်း – ဢမ်ႇတွၼ်ႉၶတ်းပိူၼ်ႈ
လၢတ်ႈဢမ်ႇႁူႉတူဝ် – ၶူဝ်ဢမ်ႇႁူႉႁၢင်ႈ
လၢတ်ႈပႆႇယဝ်ႉပေႃးၶူဝ် – ႁူဝ်ဝႆသၼ်ႇတင်းၵူၼ်ႈ
လၢတ်ႈၵႅတ်ႇႁူဝ်ႁၢင် – ၵၢင်မၼ်းပွႆႇၵူၼ်ႈ
လၢတ်ႈၶပ်ႉပေႃးၶိူဝ်း – သူပ်းပိူဝ်းၼမ်ႉလၢႆးၽူင်ႉ
လၢတ်ႈယွင်ႈဢၢမ်းယေႃး – ၵွတ်ႇၶေႃးၸူၵ်းထူင်
လၢတ်ႈၶိုၼ်ႈလၢတ်ႈလူင်း – ၵႂၢမ်းပူင်းဢမ်ႇမီးလွၼ်ႉ
လၢတ်ႈၶႅမ်ႉလၢတ်ႈလႅပ်ႈ – ဢုပ်ႇဢႅပ်ႈဢႅပ်ႈၽႂ်ဢမ်ႇတၼ်းထွမ်ႇ
လၢတ်ႈၶိူဝ်းလုၵ်ႈလၢၼ် – ႁၢမ်းၵၢၼ်တူဝ်ၵဝ်ႇ
လၵ်းၽႅဝ်ၵႃတွတ်ႇတွင်ႉ – ငိူဝ်ႈၽႅဝ်ၸိူၵ်ႈၵွင်ႉၶေႃး
လၵ်းလိင်းဢူၺ်းၵေႃႉဢေႇ – ငိူဝ်ႈၽႅဝ်သရေႇဢမ်ႇမီး
လၵ်ႉယိပ်းလၵ်ႉယွႆႈ – ၵွႆႈယူႇၵွႆႈၽၢၼ်
လၵ်ႉႁူႉလၵ်ႉႁဵတ်း – မဵတ်းပႃၼႂ်းၼမ်ႉမေႃႇ
လဵၼ်ႈၵႂၢမ်းယွႆႈဢမ်ႇလႆႈ – မႆႈပိူၼ်ႈၸၢင်ႈၸပ်းႁဝ်း
လိၼ်ႉၶဵဝ်ႈၵိူတ်ႇၵိုၵ်းပႃး – တေႃႈယင်းၶူပ်းၺႃးၵၼ်
လူမ်းပဝ်ႇဢမ်ႇၼႆႈ – လႅတ်ႇမႆႈဢမ်ႇၶၢမ်ႇ
လိူၵ်ႈဝၼ်းၸင်ႇၵႂႃႇ – သမ်ႇၽႃႇၺႃးၸူၼ်
လိူၵ်ႈဝၼ်းလီႁဵတ်းႁိူၼ်း – သဝ်မၼ်းၸိူၼ်းၵူႈလႅမ်ႈ
လိၼ်ႉဢမ်ႇတူမ်ႈၸၢင်ႈၵႂၵ်း – ၶႃဢမ်ႇႁၵ်းၸၢင်ႈလႅၼ်ႈ
လဵင်ႉလုၵ်ႈထႃႈၵိၼ်ႁႅင်း – ပႅင်းငိုၼ်းၸၢႆႇမိူဝ်ႈထဝ်ႈ
လႅၼ်ၵိၼ်ၼင်ႇမႄႈမူတ်ႉ – ၵူတ်ႉၵိၼ်ၼင်ႇပူႇၽၢမ်း
လိုမ်းလႆႈ ဢမ်ႇမႆႈၼင်ႇၸႂ်ၸပ်း
လူမ်ႉတီႈလႂ် – လုၵ်ႉတီႈၼၼ်ႈ ဢမ်ႇလူဝ်ႇၵၼ်ႈၸႂ်ယူႇ
လုၵ်ႈဢွၼ်ႇႁၵ်ႉတၢင်းၵိၼ် – ၼၢႆးသိၼ်ႁၵ်ႉတၢင်းလူႇ
ပူႇသိၼ်ႁၵ်ႉတၢင်းၼွၼ်း
တွၼ်ႈ (လ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ဝ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ဝ)
ဝႃႈဝႆႉၶႅၼ်းသေဝႆႉဝႃႈ
ဝႃႈဝႆႉဢွၼ်တၢင်း – လီသေသၢင်းလၢင်းၵၼ်ဝၢႆးလင်
ဝႃႈယၢၵ်ႈသွၼ်ယၢပ်ႇ – တၢပ်ႇၵႂႃႇၵူႈပိူင်
ဝႃႈယဝ်ႉဢမ်ႇႁူၼ် – ၵူၼ်းလီဢမ်ႇၸႂ်ႈ
ဝႃႈယဝ်ႉပႆႇၸႂ်ႈ – ပိူၼ်ႈၶႂ်ႈၶူဝ်ႁဝ်း
ဝႃႈတီႈပိူၼ်ႈ – လိူၼ်ႈမႃးၸူးႁဝ်း
ဝႃႈၽၢႆႇလင် – ယင်းၵူဝ်လိူဝ်သေထႃႉၽၢႆႇၼႃႈ
ဝႃႈပိူၼ်ႈဢမ်ႇထွမ်ႇ – လမ်သွမ်ႇႁင်းႁဝ်း
ဝူၼ်ႉၸႂ်တေႃးသ – ယႃႉၶိုၼ်းတူဝ်ၵဝ်ႇ
ဝၢႆးၼႆႉဢမ်ႇလူဝ်ႇထႃႈ – ပီၼႃႈဢမ်ႇလူဝ်ႇမွင်း
ဝႃႈဝႆႉယၢမ်းလဵဝ် – ယဵဝ်လီမိူဝ်းၼႃႈ
ဝၢၼ်ၵိၼ်တၢႆ – ထၢင်ႇဢမ်ႇၽၢႆ သမ်ႇမၢတ်ႇလိုၵ်ႉ
ဝၢၼ်တီႈၶေႃး – မေႃးတီႈတွင်ႉ
ဝူၼ်ႉၼမ်ၼွၼ်းဢမ်ႇလပ်း – ၸႂ်ၸပ်းၼွၼ်းဢမ်ႇလႆႈ
ဝူၼ်ႉပႃႈၼႃႈပႃႈလင် – ႁဵတ်းသင်ဢမ်ႇသုမ်းပိူၼ်ႈ
ဝူၼ်ႉၵႂႃႇပႃႈၼႃႈ – ၽၵ်းႁႃႈမေႃႈဢမ်ႇပေႃး
ဝူၼ်ႉၶိုၼ်းတၢင်းလင် – မီးသင်ဢမ်ႇလီဝႆႉ
ဝူဝ်းတဝ်ႁႆႈ – ပိူၼ်ႈတဵၵ်ႈလႆႈတူဝ်လိုၼ်း
ဝူဝ်းၵႂၢႆးဢမ်ႇမေႃလၢတ်ႈ – ႁၵ်ႉၸၢတ်ႈလိူဝ်သေၵူၼ်း
ဝူဝ်းၽၢတ်ႇၽုင်ပဵၼ်ၼိူဝ်ႉ – ၵူၼ်းၽၢတ်ႇၸိူဝ်ႉပဵၼ်ပိူၼ်ႈ
ဝူတ်ႈၵၢင်ႇတၢင်ႇပိုၼ် – ၶိုၼ်မိုဝ်းဢမ်ႇလႆႈ
ဝူဝ်းထဝ်ႈဢမ်ႇၵူဝ်ၶႂၢၼ် – ၵူၼ်းၽၢၼ်ဢမ်ႇၵူဝ်ၼီႈ
ဝၵ်ႉပႃႈသၢႆႉဢမ်ႇမႃး – ဝၵ်ႉပႃႈၶႂႃဢမ်ႇလႆႈ
ဝိရိယသိူဝ်ႈႁၢႆ – ပၺ်ႇၺႃႇယႂ်ႇၽို်ၼ်းၶၢႆ
တွၼ်ႈ (ဝ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ႁ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ႁ)
ႁႃတီႈၵိူတ်ႇၸင်ႇတၢႆ – ႁႃတီႈၶၢႆၸင်ႇသိုဝ်ႉ
ႁႃၶဝ်ႈယႃႇဢိုၼ်း – ႁႃငိုၼ်းယႃႇၶၢၼ်ႉ
ႁႃပႃဢမ်ႇလႆႈငူမ်းႁွႆ – ဢမ်ႇလႆႈတူဝ်လွႆဢဝ်တူဝ်ၼမ်ႉ
ႁဝ်ႈႁူႉၸႂ်ပိူၼ်ႈ – ယႃႇပွႆႇငိူၼ်ႈၸႂ်ႁဝ်း
ႁဝ်းပဵင်းၶႃ ႁႃးပဵင်းၶဝ်ႇ – ၸဝ်ႈၵဝ်ႇပဵင်းႁူဝ်မႄႈတိၼ်
ႁဝ်းႁဵတ်းႁဝ်းလႆႈ – ႁႆႈဢဝ်ၽႂ်ဢမ်ႇပၼ်
ႁဵတ်းသင်ႁဵတ်းတႄႉတႄႉ – ၵိၼ်ဢမ်ႇပႄႉပေႃးၶၢႆ
ႁဵတ်းလဵၼ်ႈပဵၼ်တႄႉ
ႁဵတ်းၼႃးလူဝ်ႇမီးႁွင်ႈ – လွင်ႈၵႃႉလူဝ်ႇမီးပိူင်
ႁဵတ်းပႆႇလီၶိုၼ်းယႃႉ – ၵႃႉဢမ်ႇသုၼ်ႇလၢႆႈလၢႆးမၼ်း
ႁဵတ်းမိူဝ်ႈၶၢၼ်ႉ – ၵိၼ်မိူဝ်ႈသၢၼ်ႉ
ႁဵတ်းယႅပ်းယႅပ်း – လႆႈၵိၼ်ၸႅပ်းၸႅပ်း
ႁဵတ်းယၢပ်ႇယၢပ်ႇ – လႆႈၵိၼ်ၸၢပ်ႇၸၢပ်ႇ
ႁဵတ်းသင်ႁဵတ်းၶႅမ်ႉၶႅမ်ႉ – ပေႃးလွမ်ႉလႅမ်ႉၸဵဝ်းလႅဝ်
ႁဵတ်းၵၢၼ်ဝႃႈဢမ်ႇတၼ်း – ၼွၼ်းဝၼ်းဢမ်ႇလိူၵ်ႈၶိင်ႇ
ႁၢင်ႈၸႃႉၸႂ်ၶမ်း – ၼွၼ်းၸမ်ၸင်ႇႁူႉ
ႁၢင်ႈလီဢမ်ႇၵႃႈ – ႁၢင်ႈၸႃႉဢမ်ႇပေႃး
ႁၢင်ႈၸႃႉမၢၵ်ႇလၢင်းၶမ်း – တမ်းမူႇလႂ်ၵူၼ်းၶွၼ်ႈ
ႁၢင်ႈလီမၢၵ်ႇၶီႈၵႃ – တမ်းတႂ်ႈၽႃၽႂ်ဢမ်ႇၶႂ်ႈတူၺ်း
ႁၢင်ႈသဝ်ႈလမ်ၵႃ – ၵွႆးႁၼ်တႃလႄႈၶဵဝ်ႈ
ႁၢင်ႈၸႃႉတႃတူၺ်ႇ – လၢတ်ႈဝူၺ်ႇၶူဝ်ႁႅင်း
ႁၢင်ႈလီမီးၵၢမ်ႇ – ၵျၢမ်ႇလီမီးငိုၼ်း
ႁၢင်ႈၸႃႉၼမ်ႉယင်းၼႂ်း – မႂ်းၸိမ်းတူၺ်းၸင်ႇႁူႉ
ႁူဝ်ဢူၼ်ႈပိူၼ်ႈတဵၵ်း – ႁူဝ်လဵၵ်းပိူၼ်ႈဝႆႉ
ႁူဝ်ၶႅၼ်ပိူၼ်ႈၸင်ႇတႅၼ်ႇ – ႁူဝ်ၶႅၼ်ႇပိူၼ်ႈၸင်ႇႁႅမ်
ႁူဝ်ၶႆႈဢမ်ႇၼွၼ်း – ႁူဝ်ၶွၼ်းဢမ်ႇလိုဝ်ႈ
ႁၵ်ႉၵၼ်ယႃႇလိုၼ်ႈ – မိုၼ်ႈၵၼ်ယႃႇလုၼ်ႈ
ႁၵ်ႉလုၵ်ႈသၢမ်ၶၼ် – ႁၵ်ႉလၢၼ်သၢမ်ၸွႆႉ
ႁၼ်ဢၼ်ဝၢၼ်ၶႂ်ႈတၢပ်ႇ – ႁၼ်ဢၼ်ယၢပ်ႇၶႂ်ႈဝႄႈ
ႁၼ်ယူႇသိူၵ်ႇလိူၵ်ႇ – ဢဝ်ႁိူၵ်ႇၵႂႃႇတမ်
ႁၼ်တူဝ်ဢမ်ႇႁၼ်ၸႂ် – ယႃႇယုမ်ႇၽႂ်သေပွၵ်ႈ
ႁွမ်ငိုၼ်ႈၸၢႆႇမိူဝ်ႈထဝ်ႈ – ႁွမ်ၶဝ်ႈဝႆႉမိူဝ်ႈပဵၼ်
ႁူဝ်တွင်ၶႂၢင်ၵေႃႈ – ႁၢင်တွင်ဝၢႆႇ
ႁွမ်ငိုၼ်းၶမ်းလႆႈယၢၵ်ႈ – ႁွမ်ဢသၢၵ်ႈဢမ်ႇယၢပ်ႇ
ႁိူၼ်းမီးၶႅဝ်း – မႅဝ်းၸင်ႇတဝ်ႈ
ႁၢႆႉဢမ်ႇပႄႉၵၢၼ် – ငၢၼ်ဢမ်ႇပႄႉၶွၼ်ႉ
ႁွင်ႉၵိၼ်ယင်းယၢပ်ႇ – ႁွင်ႉႁၢပ်ႇၶႅၼ်းတေပဵၼ်ႁိုဝ်
ႁၵ်းပိၵ်ႇတႅင်းတႃ – ႁၵ်းၶႃတႅင်းတွင်ႉ
ႁၵ်ႉၵၼ်ႁႂ်ႈပၼ်လၢႆ – သိုဝ်ႉၶၢႆႁဵတ်းၼင်ႇပိူၼ်ႈ
ႁူမ်ႈတိူဝ်ႉႁူမ်ႈလၼ်ႇ – ၽႂ်ၸႂ်ၵၼ်ႇၸင်ႇႁၼ်
ႁူဝ်တႅတ်ႈၽႃႈ – ၼႃႈတႅတ်ႈမွၼ် ၼွၼ်းႁၢႆၵိၼ်ၼမ်ႉ
ႁူဝ်ၸႂ်ၸမ်ၶီႈ – ၵီႈငၢႆႈႁုပ်ႇယၢပ်ႇ
ႁၢင်မႃသုပ်းမူၵ်ႇ – ထူတ်ႇဢွၵ်ႇၶိုၼ်းငေႃး
ႁူမ်ႈသိုဝ်ႉႁူမ်ႈၶၢႆ – ႁူႉသၢႆၸႂ်ၸႅင်ႈငၢႆႈ
တွၼ်ႈ (ႁ) သုတ်းယဝ်ႉၶႃႈ။
သိုပ်ႇတူၺ်းတွၼ်ႈ (ဢ) သေၵမ်းၶႃႈ။
Khur Yeun Education
ၵႂၢမ်းၵပ်းထုၵ်ႇ တွၼ်ႈ(ဢ)
ဢရၢင်းဢမ်ႇဢွၵ်ႇ – ၶႂ်ႈပွၵ်ႇၵိၼ်လၢႆ
ဢၵျၢင်ႉဢမ်ႇလီ – တေထူပ်းၶီဝၼ်းၼိုင်ႈ
ဢထၢင်ႇဢမ်ႇပႄႉတၢင်းၵၢတ်ႈ – မေႃလၢတ်ႈဢမ်ႇပႄႉၵျၢမ်ႇမႃႇ
ဢီႇၸၢင်ႈထၢမ်ၵေႃႈ – ဢၢမ်ၸၢင်ႈတွပ်ႇ
ဢီႇၸၢင်ႈႁၢႆႉ – ၺႃးဢၢႆႈၸၢင်ႈႁႅမ်
ဢမ်ႇၸၢင်ႈၵႃႈ – ယႃႇယူႇၼႃႈၵွင်
ဢမ်ႇၸၢင်ႈပွင် – ယႃႇယူႇၵၢင်ပိူၼ်ႈ
ဢမ်ႇႁူႉၵေႃႈလီ – ဢမ်ႇမီးၵေႃႈယဝ်ႉ
ဢမ်ႇမီးၵေႃႈႁႃ – ဢမ်ႇမႃးၵေႃႈၵူႈ
ဢမ်ႇႁူႉႁႂ်ႈထၢမ် – ဢမ်ႇငၢမ်းႁႂ်ႈတႅမ်ႈ
ဢမ်ႇႁၵ်ႉယိူၼ်ႉၸႂ်ၼူမ် – ဢမ်ႇၸူမ်းယိူၼ်ႉၸႂ်ၸုပ်ႇ
ဢမ်ႇပႅတ်ႉဢမ်ႇလႆႈၼၢင်း – ဢမ်ႇၽၢင်းဢမ်ႇလႆႈၸူႉ
ဢမ်ႇမေႃသမ်ႉၶႂ်ႈႁဵတ်း – မႄးၸဵတ်းပွၵ်ႈပႆႇယဝ်ႉ
ဢမ်ႇပွင်ႇၵေႃႈလၢတ်ႈၸွမ်း – ဢမ်ႇယွမ်းၵေႃႈႁူႉလိူဝ်
ဢမ်ႇပႄႉသမ်ႉၶႂ်ႈမႅၵ်ႇ – ႁႅင်းတႅၵ်ႇတၢႆလၢႆလၢႆ
ဢမ်ႇယူႇဢမ်ႇသဝ်း – ႁႃပေႃးမဝ်းသမ်ႉၽၢၼ်
ဢမ်ႇႁၼ်တူဝ်ၶႂ်ႈလႃႇ – ႁၼ်ၼႃႈသမ်ႉဢိတ်းလူ
ဢမ်ႇလၢတ်ႈၵေႃႈၶၢဝ်ႇဢွၵ်ႇ – ဢမ်ႇမွၵ်ႇၵေႃႈပိူၼ်ႈငိၼ်း
ဢမ်ႇႁၢင်ႈလီၵေႃႈႁၵ်ႉ – ၵွႆႈယူႇၵွႆႈထုၵ်ႇတႃ
ဢမ်ႇႁူႉယႃႇပေလၢမ်း – ၵူဝ်ပိူၼ်ႈဢၢမ်းတၢင်းငိူဝ်ႈ
ဢမ်ႇမီးပပ်ႉလွၵ်းမၢႆ – ငိုၼ်းတူၵ်းႁၢႆဢမ်ႇႁူႉ
ဢဝ်သရေႇတွင်ႉၵူင် – ၵိၼ်လူင်ၽႅဝ်တွင်ႉၵႂ်ႈ
ဢဝ်ၵၼ်ဝႃႈ ပႃးၵၼ်ပဵၼ် – ၶဝ်ႈယဵၼ်ပဵၼ်ၶဝ်ႈဢုၼ်ႇ
ဢဝ်မေးလႃႈ – ပဵၼ်ၶႃႈလုၵ်ႈ
ဢဝ်မေးၸဝ်ႉ – ပဵၼ်ၵဝ်ႉႁိူၼ်း
ဢဝ်မေးႁၢင်ႈလီ – ၶီၸႂ်မိူဝ်ႈၵႂႃႇၵႃႉ
ဢဝ်မေးႁၢင်ႈၸႃႉ – ၶီၸႂ်မိူဝ်ႈၵႂႃႇပွႆး
ဢဝ်တီႈမႂ်ႇ – သႂ်ႇတီႈၵဝ်ႇ
ဢဝ်တီႈငၢႆႈ – သၢႆႈတီႈမေႃး
ဢဝ်ၶွင်ပိူၼ်ႈႁဵတ်းႁၢင်ႈ – ၸဝ်ႈပိူၼ်ႈယူႇတႂ်ႈလၢင်ႈလွမ်တူၺ်း
ဢၼ်ၸႃႉဢမ်ႇမီး – ဢၼ်လီဢမ်ႇလႆႈဝႆႉ
ဢၢႆႈဝႃႈၸီႇ – ယီႈဝႃႈႁုင် သၢမ်ပုင်ဝႃႈႁႂ်ႈတူမ်ႈ
ဢၢႆႈလၵ်းၵေႃႈယီႈလႅမ်
ဢၢႆမွၵ်ႇၵႂႃႇၸွမ်းလူမ်း – ဢၢႆၵူၼ်းၵႂႃႇၸွမ်းၸိုဝ်ႈ
ဢူမ်ၼမ်ႉလပ်ႉၽႃႉ – ၶႂ်ႈၸႃႉဢမ်ႇသဵင်
ဢၢမ်းပႃႈၼႃႈ – ၶႃႉပႃႈလင်
ဢၢပ်ႇၼမ်ႉတႂ်ႈၶူဝ် – ဝီႁူဝ်တႂ်ႈၸၢၼ်း
ဢၢပ်ႇၼမ်ႉသွၼ်ႈႁူမ်ႈ – ၵူမ်ႈၼႃႈသွၼ်ႈလႅတ်ႇ
ဢၢင်ႈၶၢႆပိူၼ်ႈသမ်ႉယႃႉ – ဢၢင်ႈၵႃႉသမ်ႉၶၼ်လူင်း
ဢွမ်ႇၾႆးဢုၼ်ႇပႃႈၼႃႈ – ႁူမ်ႇၽႃႈဢုၼ်ႇတင်းတူဝ်
ဢၢႆႈလၢတ်ႈၼူၵ်ႇ – လွၼ်ပူၵ်ႇဝႃႈတေသွတ်ႇၵၢၼ်းႁၢမ်
ဢိုၼ်ၼမ်ႉလၢႆးသၢမ်ၽဝ်ႇ – ဝူၼ်ႉၸႂ်ၵဝ်ႇၸင်ႇလၢတ်ႈ
ဢၼ်လီလီၶႂ်ႈတၢပ်ႇ – ၵၢၼ်ယၢပ်ႇဢမ်ႇၶႂ်ႈႁဵတ်း
ဢွင်ႇဢႅင်ဢမ်ႇလႆႈၵိၼ် – ၶိၼ်ၸႂ်ဢမ်ႇလႆႈၼႃႈ
ဢုၼ်ႇၾႆးဢမ်ႇမိူၼ်ဢုၼ်ႇၽႃႈ – ဢုၼ်ႇပႃႈၼႃႈဢမ်ႇဢုၼ်ႇပႃႈလင်
ဢုၼ်ႇၽႃႈဢမ်ႇမိူၼ်ဢုၼ်ႇၾႆး – ဢုၼ်ၶၼ်ဢုၼ်ႇဝႆးဢမ်ႇလႆႈ
တွၼ်ႈ (ဢ) သုတ်းတီႈၼႆႈယဝ်ႉၶႃႈ။
ၶွပ်ႈၸႂ်ထိုင် ပီႈၼွင်ႉၽူႈသူင်တူၺ်း ၵႂၢမ်းၵပ်းထုၵ်ႇတႆးႁဝ်း ယႂ်ႇယႂ်ႇၼမ်ၼမ် ယူႇဢေႃႈ။
ၶပ်းၶိုင်>>
ၶိူဝ်းယိုၼ်း
ၵႄႇသီႇ
Khur Yeun Education